Ким Чен Ин Жанубий Кореяни босиб олиш зарурлиги ҳақида билдирди

КХДР конституцияга Жанубий Кореяни “1-рақамли душман мамлакат” сифатида киритиш  ва уруш бўлган тақдирда ишғол қилишни режалаштирмоқда.

Шимолий Корея Жанубий Кореяни 1-рақамли душман давлат сифатида тан олиши ва уруш бошланган тақдирда ўз ҳудудини тўлиқ босиб олиш мажбуриятини конституцияга ёзиши керак. Бу ҳақда Шимолий Корея етакчиси Ким Чен Ин халққа мурожаатида айтиб ўтди, деб ёзади Yonhap.

“Корея ярим оролида уруш бошланган тақдирда Корея Республикасини тўлиқ босиб олиш, бостириш ва назорат ўрнатиш ҳамда унинг ҳудудини республикага (КХДР – таҳр.) бўйсундириш масалаларини ҳисобга олиш зарур ”, – деди Ким Пхеньянда Олий халқ ассамблеясининг (парламент) навбатдаги сессияси очилишида сўзлаган нутқида.

Унинг фикрича, КХДР Жанубий Кореяни ярашув ва бирлашиш бўйича ҳамкор сифатида белгилашдан воз кечиши, шунингдек, ўзининг таълим дастурларига ўзгартиришлар киритиши ва барча шимолий кореяликлар орасида Корея Республикасини 1-рақамли душман давлат сифатидаги кучли идрокни шакллантириши керак.

Шунга асосланиб, Ким Кореялараро ярашув рамзи сифатида кўрилиши мумкин бўлган ўтмиш қолдиқларини йўқ қилиш чораларини кўришни буюрди.

“Биз икки Корея ўртасидаги чегара ҳудудларидаги барча алоқаларни, шу жумладан қуруқликдаги йўлларни қайта тикланмайдиган даражада жисмонан йўқ қилиш заруриятини тўлиқ ажратиш учун босқичма-босқич пухта чоралар кўришимиз керак”, деди у.

Шимолий Корея раҳбари, шунингдек, марҳум асосчи Ким Ир Сеннинг Кореяни федерал тизим орқали бирлаштириш режасини шарафлаш учун 2001 йилда Пхеньянда қурилган Қайтадан бирлаштириш аркасини демонтаж қилишни буюрди.

Шимолий Кореянинг ядровий қуролига келсак, Ким унинг мамлакати урушдан қочмаслигини, агар провокация бўлмаса, бир томонлама қуролли можаро бошлаш ниятида эмаслигини таъкидлади.

“Агар Жанубий Корея бизнинг ҳудудимизга, ҳаво бўшлиғимизга ва сувларимизга миллиметрнинг мингдан бир қисмига ҳам бостириб кирса, биз буни уруш провокацияси сифатида баҳолаймиз”, деди диктатор ва яна бир бор Жанубий Кореяни йўқ қилиш ва Қўшма Штатларга катта йўқотишлар ва мағлубиятлар келтириш билан таҳдид қилди.

Аввалроқ КХДР гипертовушли ракетани синовдан ўтказаётгани ҳақида эълон қилганини ёзган эдик.