Латвияда яшайдиган россияликлар депортация қилиниши мумкин

Латвияда яшовчи мингга яқин Россия фуқароси миграция департаментидан икки ҳафта ичида мамлакатни тарк этиш ёки амалдаги қонунчиликка мувофиқ яшаш мақомини тартибга солиш талаби билан билдиришнома олди, дея хабар беради DW Фуқаролик ва Миграция масалалари бўйича департаменти (ФММД) раҳбари Майра Розанинг 17 январь куни кечқурун миллий телевидениега берган интервьюсига таяниб.

Департамент маълумотларига кўра, бундай талаб 985 кишига тааллуқли бўлиб, апрелгача уларнинг сонига яна 2,5 минг россиялик қўшилиши мумкин. Билдиришномадаги кўрсатмаларга риоя қилмаса, ФММД ходимлари кўрсатилган шахсларнинг манзилларига ташриф буюриши режалаштирилмоқда. Агар бу одамлар кўрсатилган манзилда яшамаса, департамент улар аллақачон Латвияни тарк этган деб тахмин қилиш ҳуқуқига эга. Қолганларнинг ҳаммаси мамлакатдан чиқиб кетишга мажбур.

Ушбу чора-тадбирлар Россиянинг Украинага кенг кўламли бостириб кириши бошланганидан кейин киритилган Латвия Республикасининг иммиграция тўғрисидаги янгиланган қонуни муносабати билан қабул қилинди. Янги қонунга кўра, 2023 йил сентябрь ойида Россия Федерацияси фуқароларига доимий яшаш учун рухсатномалар қонуний кучини йўқотди.

Латвияда қолиш учун Россия фуқаролари энди Европа Иттифоқида доимий яшаш мақомини олиш учун ариза топширишлари керак. Бу жараён ФММДга латиш тилини А2 даражасида билишни тасдиқловчи ҳужжатни тақдим этиш ва молиявий ресурслар мавжудлиги тўғрисидаги сертификатни тақдим этишни ўз ичига олади.

Латвияда яшаш мақомини тартибга солиш жараёнини бошлаганларга давлат тили имтиҳонини топшириш ва доимий яшаш учун рухсатнома олиш учун икки йиллик муддат берилади.

​