Мамлакатнинг учта вилоятида ичимлик суви тарифлари қарийб икки бараварга оширилмоқда

Халқ депутатлари вилоят Кенгаши томонидан қабул қилинган қарорга кўра, 20 августдан бошлаб Тошкент вилоятида ичимлик суви таъминоти ва канализация хизматлари учун тарифлар оширилади. Бу ҳақда «Ўзсувтаъминот» компаниясининг матбуот хизмати хабар беради.

Шундай қилиб, 20 августдан бошлаб:

Ичимлик суви (1 кубометр учун):

аҳоли учун – 1700 сўм (илгари 950 сўм);

бюджет ташкилотлари ва улгуржи истеъмолчилар учун – 7000 сўм (илгари 4000 сўм).

Оқова сув хизмати (1 кубометр учун):

аҳоли учун – 850 сўм (илгари 700 сўм);

бюджет ташкилотлари ва улгуржи истеъмолчилар учун – 1850 сўм (илгари 1300 сўм).

Мос равишда Тошкент вилоятида фаолият юритаётган “Чимён-Чорбоғ сув таъминоти” ва “Мусаффо оби ҳаёт” корхоналарининг абонентлари учун тарифлар ошади.

Аввалроқ Сурхондарё ва Қашқадарё вилоятларида ҳам ичимлик суви таъминоти ва оқова сув хизмати тарифлари оширилган эди. Хусусан, 1 августдан бошлаб:

Сурхондарё вилояти: вилоят аҳолиси учун ичимлик суви тарифлари 1 куб метр учун 1150 сўмдан 2140 сўмга, оқова сув хизмати учун тарифлар 650 сўмдан 950 сўмга оширилди;

Қашқадарё вилояти: тарифлар ичимлик суви учун 1000 сўмдан 2000 сўмга, оқова сув хизмати учун эса 950 сўмдан 1000 сўмга оширилди.