Миллий гвардия қошида ўзини-ўзи таъминлайдиган қўриқлаш хизмати ташкил қилинади

Ўзбекистон Миллий гвардияси Қўриқлаш бош бошқармаси ҳузурида ходимлари давлатга қарашли ташкилотлар, шунингдек, жисмоний ва юридик шахслар томонидан ишга қабул қилиниши мумкин бўлган қўриқлаш ва патруль хизматини ташкил этиш режалаштирилмоқда. Бу ҳақда жамоатчилик муҳокамаси учун эълон қилинган ҳукумат қарорининг лойиҳасида сўз боради, деб ёзади «Фергана» нашри.

Янги бўлинма ўзини-ўзи таъминлаши режалаштирилган, яъни ташкилотга давлат бюджетидан маблағ ажратилиши кўзда тутилмаган.

Миллий гвардияга қўриқлаш-патруль хизмати хизматларининг тарифларини ишлаб чиқиш ва тасдиқлаш топширилди.

Лойиҳада қайд этилганидек, мазкур хизмат вужудга келаётган криминоген ва ижтимоий вазиятга тезкор таъсир кўрсатиш, маҳаллий ўз-ўзини бошқариш органларининг  жамоат хавфсизлигини таъминлаш, ҳуқуқбузарликларнинг олдини олиш ва жиноятчиликка қарши курашиш учун қўшимча куч ва воситаларни жалб қилиш ваколатларини кенгайтириш мақсадида ташкил этилмоқда.

Бир қатор ҳудудларда давлат ва хўжалик бошқаруви органлари, маҳаллий давлат ҳокимияти органлари ва бошқа ташкилотлар, жисмоний ва юридик шахслар билан тузилган ихтиёрий шартномалар асосида қўриқлаш ва патруль хизматларини ташкил этиш кўзда тутилган.

Хизматнинг асосий вазифаларига шартномада кўрсатилган ҳудудда жамоат тартибини сақлаш ва жамоат хавфсизлигини таъминлаш; патруль ҳудудидаги ноқонуний хатти-ҳаракатларни ўз вақтида аниқлаш, олдини олиш ва бартараф этиш; объектлар ва мулкни шартнома бўйича ҳимоя қилиш киради.

Тақдим этилган маълумотларга қараганда, сўз давлат тузилмаси қошида хусусий қўриқлаш корхонаси (ХҚК) ташкил этилиши ҳақида кетмоқда.

Янги идора ходимларига Миллий гвардиянинг оддий бўлинмалари функцияларига ўхшаш жуда кенг ваколатлар берилиши режалаштирилган. Хусусан, улар қуйидагиларга эга бўлади:

• Миллий гвардия зиммасига юкланган вазифаларнинг бажарилиши учун ички ишлар органларининг, шунингдек бошқа вазирликлар, давлат қўмиталари ва идораларининг ахборот тизимлари ва маълумотлар базаларига кириш;
• мансабдор шахслар ва фуқароларнинг ҳужжатларини, шу жумладан шахсини тасдиқловчи ҳужжатларни текшириш, шахсий тинтув (тинтув), ашёларини, транспорт воситаларини ва олиб ўтилаётган товарларини кўздан кечириш, шу жумладан техник ва бошқа назорат воситаларидан фойдаланган ҳолда тинтув ўтказиш ҳуқуқи;
• қонун ҳужжатларида назарда тутилган ҳолларда ва белгиланган тартибда жисмоний куч, махсус воситалар ва хизмат қуролидан фойдаланиш ҳуқуқи.