Наманган вилоятида 71 нафар бола заҳарланиш билан касалхонага ётқизилди

Наманган вилоятининг Чуст туманида тўққизта боғча ва иккита мактаб тарбияланувчилари, жами 70 дан ортиқ бола заҳарланиш билан касалхонага ётқизилди.

Namanganliklar.uz Телеграм-каналида вилоят соғлиқни сақлаш бошқармаси 21 сентябрь куни соат 16:00 дан бошлаб туман тиббиёт бирлашмасига 71 нафар бола ётқизилгани ҳақида хабар берган. Уларда иситма, баъзиларида қорин оғриғи, диарея ва қусиш каби аломатлар кузатилган.

Болалар айнан нимадан заҳарланганига аниқлик киритилмаган. Ижтимоий тармоқлар фойдаланувчилари болалар давлат дастури доирасида болаларга бепул берила бошланган таркибида йод бўлган дори воситаларидан заҳарланган, деб тахмин қилмоқда. Болаларга антиструмин ва йодомарин берилган.

Бу маълумотлар текширилмоқда.

Болаларга зарур тиббий ёрдам кўрсатилган ва вазият Соғлиқни сақлаш вазири томонидан назорат қилинмоқда.

22 сентябрь куни Ўзбекистон Соғлиқни сақлаш вазирлиги Чустда болаларнинг оммавий заҳарланишини тасдиқловчи баёнотни тарқатди, бироқ эҳтимолий сабабларни ҳам, қурбонлар сонини ҳам кўрсатмади. Вазирлик аввалроқ касалхонага ётқизилган 73 нафар бола ҳақида баёнот берган эди. Бу хабар сайтдан олиб ташланган, деб ёзади «Газета.уз» нашри.

Шунингдек, 22 сентябрь куни Наманган вилояти соғлиқни сақлаш бошқармаси болаларни даволаш муассасасидан аста-секин чиқариб юбораётгани ҳақида хабар берди. Ҳозирда ўнта бола касалхонага чиқарилгани маълум.

Бош прокуратуранинг матбуот хизмати заҳарланиш бўйича терговга қадар текширув ўтказилаётганини маълум қилди. Вазият прокуратура назорати остига олинган.