Оқ уй Исроилга ёрдам маблағини тақдим этиш бўйича қонун лойиҳасига қарши чиқди

Оқ уй Вакиллар палатасидаги республикачилар томонидан Исроилга ёрдам бериш учун таклиф қилинган 17,6 млрд долларлик ёрдам бўйича қонун лойиҳасини танқид қилди. Матбуот котиби Карин Жан-Пьернинг қайд этишича, Сенатда тайёрланаётган қонун лойиҳасидан фарқли ўлароқ ҳужжатга Украинага ёрдам ва АҚШ чегарасини мустаҳкамлаш учун ажратиладиган маблағлар киритилмаган. У республикачиларнинг ҳаракатларини “бемаъни сиёсий манёвр” деб атаган.

“Исроилнинг хавфсизлиги сиёсий ўйин эмас, муқаддас бўлиши керак. Биз бу найрангга кескин қаршимиз”, – деди Жан-Пьер хоним ўз баёнотида.

Оқ уйнинг қайд этишича, республикачилар томонидан таклиф қилинган ҳужжат чегарани ҳимоя қилиш, Украина ва фаластинлик қочқинлар учун ҳеч нарса қилмайди. Карин Жан-Пьер таъкидлаганидек, маъмурият икки партияли сенаторлар гуруҳи билан қўшимча молиялаштириш тўғрисидаги қонун лойиҳаси бўйича келишувга эришиш учун бир неча ой давомида ишламоқда.