Ўзбекистон делегацияси Туркий давлатлар Парламент ассамблеясининг XIII ялпи мажлисида иштирок этишди

Олий Мажлис Сенати Раиси Танзила Нарбаева бошчилигидаги Ўзбекистон делегацияси Туркий давлатлар Парламент ассамблеясининг (ТуркПА) Боку шаҳрида “Турк дунёси учун яшил уфқлар: яшил кун тартибини амалга оширишда парламентларнинг роли” мавзусида ўтказилган XIII ялпи мажлисида иштирок этди.

Тадбирда ТуркПАга аъзо мамлакатлар парламентлари раҳбарлари, шунингдек, ТуркПАнинг кузатувчи аъзолари делегатлари ва халқаро ташкилотлар вакиллари қатнашди.

“Иштирокчилар “яшил” иқтисодий ўсишни таъминлаш, яшил энергияни жорий қилиш, иқлим ўзгаришига қарши курашиш, атроф-муҳитни муҳофаза қилиш, табиий ресурслардан оқилона фойдаланиш ва бу борада парламентлараро ҳамкорликни яна-да ривожлантириш масалаларини муҳокама қилдилар”, – дейилади хабарда.

Ялпи мажлисда сўзга чиққан Олий Мажлис Сенати Раиси “яшил кун тартиби”  бўйича парламентлар даражасида ҳамкорлик кенг истиқболларга эга эканлигини алоҳида қайд этди.

Танзила Нарбаева йиғилиш мавзусининг долзарблигини таъкидлаб, парламентларнинг илмий-тадқиқот институтлари, марказлари, тегишли қўмиталарнинг мунтазам ҳамкорлигини таъминлаш зарурлигига иштирокчилар эътиборини қаратди. Шунингдек, биргаликда тадқиқотлар ўтказиш, илмий асосланган таклифларни ишлаб чиқиш ва ҳукуматларга тақдим этиш амалиётини кенг жорий этиш бўйича фикрларини баён қилди.

ТуркПА XIII ялпи мажлиси якунлари бўйича Боку декларацияси қабул қилинди.