Ўзбекистонда ОИИБнинг Йиллик Бошқарувчилар Кенгаши йиғилиши ўтказилади

Осиё Инфратузилмавий Инвестициялар Банки (ОИИБ) 2024 йил 25-26 сентябрь кунлари Самарқандда «Ҳаммага барқарор инфратузилма яратиш» мавзусида тўққизинчи йиллик Бошқарувчилар Кенгаши йиғилишини ўтказади. Бу ОИИБнинг Марказий Осиёда ўтказилаётган биринчи йиллик йиғилиши бўлади.

Йиллик йиғилиш ОИИБнинг энг муҳим тадбирларидан бири бўлиб, Банкнинг ютуқлари билан танишиш ва унинг стратегик ривожланиш ва ташаббуслари бўйича тавсиялар олиш учун ноёб имкониятдир.

Осиё Инфратузилмавий Инвестициялар Банки (ОИИБ) – бу кўп томонлама ривожланиш банки бўлиб, у барқарор, экологик тоза ва технологик инфратузилмани молиялаштириш орқали Осиёда ва ундан ташқарида инсонларнинг ижтимоий ва иқтисодий фаровонлигини ошириш билан шуғулланади. Ҳозирги кунда АИИБда 109 иштирокчи мавжуд. Банк барқарор инфратузилмани қўллаб-қувватлаш, трансчегаравий алоқаларни мустаҳкамлаш ва хусусий капитални сафарбар қилишга қаратилган. Марказий Осиёда ОИИБ минтақавий алоқаларни ривожлантириш, энергия ва сув ресурслари бошқарувини яхшилаш ҳамда иқтисодий ўсишни рағбатлантиришда асосий роль ўйнайди.

Банк ташкил этилганидан буён Ўзбекистондаги лойиҳаларга 3,1 миллиард доллардан ортиқ инвестиция киритди. 2024 йил бошида ушбу ҳамкорлик Президент Мирзиёев томонидан 2,6 миллиард АҚШ долларига тенг давлат томонидан қўллаб-қувватланадиган лойиҳалар учун уч йиллик келишув имзоланиши билан ривожланди.

2024 йилги йиллик йиғилишда икки кун давомида инфратузилмани молиялаштиришдаги инноватсиялар, иқлим ўзгаришига мослашув ва барқарор ривожланиш ҳамда инфратузилма лойиҳаларининг рақамли трансформациясига бағишланган 25 дан ортиқ панель муҳокамалари бўлиб ўтади. Тадбирда очилиш маросими, бошқарувчилар иштирокидаги давра суҳбати, Бошқарувчилар Кенгашининг расмий сессияси, матбуот анжумани ва жамоатчилик ҳамда фуқаролик жамияти билан ҳамкорликка оид қатор тадбирлар ўтказилади.

Асосий спикерлар қаторида ОИИБ президенти ва Директорлар кенгаши раиси Жин Лицюн ҳамда Халқаро молиявий корпорация, Жаҳон банки, Осиё тараққиёт банки, Европа инвестиция банки ва Ислом тараққиёт банки раҳбарияти бўлади. Бундан ташқари, тадбирда БМТ Атроф-муҳит дастури, БМТнинг Иқлим ўзгариши бўйича доиравий конвенцияси, Cитибанк, Гави, Милкен институти, Рокфеллер жамғармаси ва Тоза ҳаво жамғармаси каби халқаро ташкилотлар ва хусусий компаниялардан экспертлар иштирок этади.

ОИИБнинг йиллик йиғилиши Банкнинг иштирокчилари, ҳамкор институтлар, бизнес етакчилари, фуқаролик жамияти вакиллари ва турли соҳалар экспертлари билан яқиндан ҳамкорлик қилиш учун муҳим платформа ҳисобланади. Тадбирга рўйхатдан ўтиш очиқ ва ушбу ҳавола орқали кириш мумкин.

ОИИБ ҳақида 

Осиё Инфратузилмавий Инвестициялар Банки (ОИИБ) – бу халқаро ривожланиш банки бўлиб, унинг миссияси келажакнинг барқарор ривожланишга асосланган инфратузилмасини молиялаштиришдир. Банк 2016 йил январь ойида Пекинда ўз фаолиятини бошлади ва шу вақтдан бери дунё бўйлаб 109 тасдиқланган иштирокчига эга бўлди. Банкнинг капитализацияси 100 миллиард АҚШ долларини ташкил этади. Банк йирик халқаро кредит рейтинг агентликлари томонидан Triple-А рейтингига эга. Ҳамкорлар билан биргаликда ОИИБ мижозларнинг эҳтиёжларини қондириб, янги капитални жалб қилиш ва экологик тоза, технологик ривожланган ва минтақавий алоқаларни ривожлантирувчи инфратузилмага инвестиция қилиш билан шуғулланади.