Оила шифокорлари маошларини икки баравар ошириш режалаштирилмоқда

Соғлиқни сақлаш вазирлиги томонидан ишлаб чиқилган ва муҳокама қилиш учун ҚҲТБТ порталида жойлаштирилган Стратегия  лойиҳасида замонавий ва самарали бошқарув усуллари ҳамда молиявий механизмларни жорий қилиш орқали тиббий хизмат сифатини ошириш мақсадида 2030 йилгача амалга ошириладиган устувор вазифалар ва янги йўналишлар келтириб ўтилган.

2024–2026 йилларга мўлжалланган амалий чора-тадбирлар режасида қайд этилган вазифалар ижросини таъминлаш учун 270 дан ортиқ чора-тадбирлар, шунингдек 2030 йилгача эришиладиган самарадорлик кўрсаткичлари ишлаб чиқилган.

Замонавий ва самарали бошқарув усуллари ҳамда молиявий механизмларни жорий қилиш орқали тиббий хизмат сифатини ошириш мақсадида 2030 йилга қадар:

соғлиқни сақлашнинг қуйи (бирламчи), ўрта (иккиламчи) ва юқори (учламчи) бўғимларидаги муассасаларни молиялаштириш манбаси, тиббий хизмат кўрсатиш ҳажми ва шакллари ҳамда бошқарув усуллари белгиланган янги миллий тиббий ёрдам тизими;

кафолатланган тиббий хизматларнинг аниқ ҳажми, пулли тиббий хизматлар турини кенгайтириш;

давлат тиббиёт муассасаларига молиявий мустақиллик бериш ва молиявий фаолиятини бизнес режа асосида юритиш механизмларини босқичма-босқич жорий этиш;

стационар тиббиёт муассасаларида «ҳар бир даволанган ҳолат» учун молиялаштириш орқали давлат тиббий суғуртаси механизмларига тўлиқ ўтиш ва бошқалар назарда тутилмоқда.