Олти киши ҳалок бўлган ёнғиндан сўнг Фарғона ертўлалари текшириладиган бўлди

Фарғона вилояти Фавқулодда вазиятлар бошқармаси томонидан 29 июль куни 6 кишининг ҳаётига зомин бўлган ёнғиндан кейин 25 та ишчи гуруҳи тузилди. Бу ҳақда ФВБ матбуот хизмати хабар берди, деб ёзади “Фергана” нашри.

Ишчи гуруҳларга 73 та маҳалла ҳудудидаги кўп қаватли турар-жой биноларининг ертўлаларида тадбиркорлар томонидан ташкил этилган савдо ва маиший хизмат кўрсатиш объектлари, ўқув марказлари, кўнгилочар масканларнинг ёнғин хавфсизлиги ва санитария ҳолатини текшириш бўйича топшириқлар берилган.

Фарғона шаҳри Сайилгох кўчасидаги тўрт қаватли уйнинг ертўласида жойлашган караоке кафесида куннинг биринчи ярмида ёнғин содир бўлган. Фавқулодда вазиятлар вазирлиги хабарига кўра, ҳодиса ҳақидаги сигнал соат 11:39да олинган, соат 11:44 да 6 та ўт ўчириш ва қутқарув гуруҳи воқеа жойига етиб келган, соат 11:56 да ёнғин тўлиқ ўчирилга.

Ёнғин оқибатида олти киши ҳалок бўлган – дастлабки маълумотларга кўра, улар тутундан заҳарланган. Яна 7 киши турли тан жароҳатлари билан касалхонага ётқизилган. Ҳолат юзасидан Ўзбекистон Жиноят кодексининг 259-моддаси («Ёнғин хавфсизлиги қоидаларини бузиш») билан жиноят иши қўзғатилган.

Вазиятни ўрганиш, ҳалок бўлганлар ва жароҳатланганларнинг оила аъзоларига ёрдам кўрсатиш учун Президент топшириғига биноан Бош вазир ўринбосари Очилбай Раматов бошчилигидаги ҳукумат комиссияси Фарғонага жўнат кетган.