Ўзбекистонда жисмоний шахслар кунига 5 килограммдан ортиқ бўлмаган балиқларни текин овлаши мумкин

Вазирлар Маҳкамасининг 09.02.2024 йилдаги “Ўзбекистон Республикасининг табиий сув ҳавзаларида балиқ овлаш қоидаларини тасдиқлаш тўғрисида”ги 80-сон қарори қабул қилинди.

Унга кўра:

• балиқ овлаш билан шуғулланувчиларнинг ҳуқуқ ва мажбуриятлари;
• спорт-ишқибозлик туридаги ва саноат усулида балиқ овлаш;
• ноқонуний балиқ овлаш оқибатида етказилган зарарларши ҳисоблаш;
• ноқонуний балиқ овлаш ҳолатларини аниқлаган балиқчилик хўжаликлари ҳамда ваколатли шахсга пул мукофоти бериш тартиби ва бошқа қоидалар белгиланмоқда.

Шунингдек, қуйидаги муддатларда балиқ овлаш тақиқланиши ҳам эслатиб ўтилган.

• 11 мартдан 31 майга қадара – Амударё ва Сирдарёда;
• 26 апрелдан 10 июнга қадар – Қорақалпоғистондаги ва Хоразм вилоятидаги табиий сув ҳавзаларида;
• 16 апредлан 31 майга қадар – бошқа сув ҳавзаларида.

“Спортчи-ишқибозларга суткасига 5 кг дан кўп бўлмаган миқдорда балиқ (ёки белгиланган вазндан ошганда 1 та балиқ) овлашга рухсат берилади. Бошқа ҳолларда сув ҳавзаларига бириктирилган субъектлар билан келишилган ҳолда ёки тўлов асосида балиқчилик хўжаликларининг йўналишлари бўйича балиқ овлашга рухсат берилади”, – дейилган хабарда.

Балиқчилик хўжаликлари томонидан ноқонуний балиқ овлаш фактларини аниқлаганда, ундирилган зарар миқдорининг 15% хўжаликнинг ҳисобига йўналтирилади.

Ноқонуний балиқ овлашни бевосита аниқлаган ва маъмурий ҳуқуқбузарлик тўғрисида баённома тузган ваколатли шахс етказилган зарар миқдорининг 15% миқдорида рағбатлантирилади. Ҳужжат Қонунчилик маълумотлари миллий базасида эълон қилинган ва 11.05.2024 йилдан кучга киради.