Россия Ўзбекистонда фуқаро дронларини ишлаб чиқаришни маҳаллийлаштиришни режалаштирмоқда

Россия ва Ўзбекистон ҳукумат раҳбарларининг қўшма комиссияси йиғилишида Россия бош вазири Михаил Мишустин Ўзбекистонда фуқаролик дронларини ишлаб чиқаришни маҳаллийлаштириш режасини маълум қилди.

Москва ва Тошкент республикада дронлар тизимлари ва уларнинг бутловчи қисмларини ишлаб чиқаришни ташкил этиш имкониятларини кўриб чиқмоқда.

Бундан ташқари, Россия темир йўл машинасозлиги соҳасида ҳам ҳамкорликни ривожлантириш, жумладан, ушбу саноат соҳаси учун полимер материаллар ишлаб чиқаришни режалаштирмоқда.

Маълумот учун, сўнгги етти йил ичида Россия ва Ўзбекистон ўртасидаги товар айирбошлаш ҳажми 2,5 баробар ошиб, 2023 йилда 10 миллиард долларга етди. Жорий йилда қўшимча 30% ўсиш кузатилди, яқин келажакда бу кўрсаткични 30 миллиард долларга етказиш режалаштирилган.

Қўшма инвестиция лойиҳаларининг умумий ҳажми 60 миллиард долларни ташкил этади, Россия иштирокидаги корхоналар сони эса 3 мингдан ошди. Кооперация энергетика, тоғ-металлургия, тўқимачилик ва кимё саноати каби тармоқларни ҳамда бошқа соҳаларни қамраб олади.

Учрашув давомида томонлар дори воситаларини маркалаш кодларини ўзаро алмашиш бўйича ҳам келишувга эришдилар ҳамда “Агроэкспресс” лойиҳасини амалга ошириш бўйича келишув имзоладилар.