Самарқандда Украинадаги урушда Россия томонида жанг қилган фуқарога ҳукм ўқилди

Жиноят ишлари бўйича Самарқанд вилояти Жомбой туман суди Россияда бўлган вақтида армия сафига қўшилган ва Украина ҳудудидаги жангларда қатнашган ўзбекистонликни уч йилга озодликдан маҳрум қилди. Эркак ёлланиш моддаси бўйича айбдор деб топилди, дея хабар беради Repost.uz суд материалларига таяниб.

Қарорга кўра, айбланувчи жазони умумий режимли колонияда ўтайди.

Суд материалларида Ўзбекистон фуқароси Санкт-Петербургда ишлагани кўрсатилган. Аниқ ким бўлиб ишлагани маълум эмас. 2023 йилда чет эл фуқаросига Россия фуқаролиги эвазига армияда хизмат қилиш таклиф қилинган. “Уруш қатнашчиларига паспорт берилади, дейишди. Улар бизни ўшанда хотиржам юриб, хоҳлаган ишимизни қила олишимизга ишонтиришди. Бундай таклиф кимга ёқмайди?” — дея тушунтиради ўз қарорини судланувчи.

Унинг қўшимча қилишича, расмийлар унга Ўзбекистон фуқаролигини сақлаб қолишга ваъда берган, бу ҳам муҳожирни фронтга кетишга ундаган. Натижада, эркак ўз ихтиёри билан Россия қуролли кучлари билан шартнома тузиб, керакли тайёргарликдан ўтиб, Украинага жўнаб кетган ва у ерда жанговар ҳаракатларда қатнашган.

Ўтган йилнинг октябрь ойида ёлланма жангчи жароҳатланган. У Санкт-Петербург ҳарбий госпиталига даволаниш учун жойлаштирилган. Чет эллик Россия фуқаролигини олишга муваффақ бўлгач, ватанига кетишга қарор қилган.

Ўзбекистон хавфсизлик кучлари уйига қайтган фуқаронинг телефонини текширар экан, унинг Украинада Россия қўшинлари томонида жанг қилганига оид далилларни топди. Терговчилар “ёлланиш” бўйича жиноят ишини қўзғатган.

Судда ўзбекистонлик айбига иқрор бўлиб, ўз ҳимоясига хорижликларнинг Россиядаги оғир аҳволи туфайли урушга кетганини айтди. Унинг сўзларига кўра, бу мамлакат паспорти кўп муаммоларни ҳал қилган, шунинг учун муҳожир расмийларнинг таклифига рози бўлган.