Шавкат Мирзиёев метан нархининг асоссиз оширилишига йўл қўймасликни топширди

Президент газ нархининг асоссиз оширилишига йўл қўймаслик бўйича ҳукуматга қатъий топшириқлар берди. Бу ҳақда энергетика вазирининг ўринбосари Азизхўжа Қобилов маълум қилган, у нархлар бўйича кўплаб муҳокамалардан сўнг газ нархини либераллаштириш масалалари бўйича маълумот берган.

1 августдан суюлтирилган газнинг (метан) бир кубометри учун 3750 сўм бўлган максимал нарх бекор қилинди. Шу тариқа, кечаги кундан бошлаб автомобилларга ёқилғи қуйиш шохобчаларида нархлар бозор томонидан тартибга солина бошланди.

“Харид қилинган табиий газ нархи ва солиқ ставкалари қатъий белгиланганлигини ҳамда сақлаш харажатларида сезиларли ўзгаришлар кутилмаслигини ҳисобга олиб, 1 августдан кейин автомобиллар учун газ нархининг кескин ошиши учун етарли асос йўқ, деб ҳисоблаймиз”, – деди Азизхўжа Қобилов.

Шунингдек, у тадбиркорларга нархларни белгилашда эркинлик бериш “ўзлари хоҳлаган нарсани қилиши мумкин” дегани эмаслигини таъкидлади.

Қайд этилишича, бугунги кунда хўжалик юритувчи субъектлар томонидан суюлтирилган газ олиб киришда ҳеч қандай тақиқ ва чекловлар мавжуд эмас. Суюлтирилган газ нархларининг барқарорлигини таъминлаш мақсадида ишлаб чиқарувчилар ва импорт қилувчилар томонидан маҳсулотларни сотиб олишга бўлган талаб ҳажмидан келиб чиқиб, уни изчил равишда биржа савдоларига қўяди.

Рақобатни ривожлантириш ва истеъмолчилар ҳуқуқларини ҳимоя қилиш қўмитаси, Бош прокуратура, “Ўзэнергоназорат” ва бошқа мутасадди органлар метан нархининг асоссиз оширилишига йўл қўймаслик учун унинг барқарорлигини назорат қилади.

Агар сотилаётган ёқилғи нархини сунъий равишда ошириб юбориш ҳолатлари аниқланса, тадбиркорлик субъектлари қонун ҳужжатларида белгиланган тартибда жавобгарликка тортилади, уларга ёқилғи етказиб бериш тўхтатилади.