Шавкат Мирзиёев Ўзбекистон ва Хитой муносабатларига баҳо берди

Хитой билан кўп қиррали муносабатларни ривожлантириш Ўзбекистон Республикаси ташқи сиёсатининг асосий устувор йўналишларидан бири бўлиб қолмоқда, дея қайд этади президент Шавкат Мирзиёев Global Times газетасидаги мақолада.

Давлат раҳбари 30 йил давомида икки давлат етакчиларининг мунтазам учрашувлари ва ўзаро ишончга асосланган мулоқотлари туфайли Тошкент ва Пекин ўртасидаги ҳамкорлик янги тарихий чўққиларга кўтарилганини алоҳида таъкидлади.

Шунингдек, ҳар икки давлатни суверенитет, ҳудудий яхлитлик, ўз тараққиёт йўлига ҳурмат каби икки давлатнинг туб манфаатлари муштараклиги бирлаштиради, дейди Мирзиёев.

Савдо ҳақида гапирадиган бўлсак, ўтган йили икки давлат ўртасидаги товар айирбошлаш ҳажми 40 фоизга ошди. Бундан ташқари, Хитой Ўзбекистоннинг асосий савдо шериги ҳисобланади.

Хитой сармоялари эвазига Ўзбекистон Республикаси 2030 йилгача 27 ГВт қувватга эга яшил энергия лойиҳаларини ишга туширишни режалаштирмоқда.

Ҳар икки давлат модернизация ва ижтимоий-иқтисодий муаммоларни ҳал этиш соҳасида ҳамкорликни йўлга қўйган.

Мирзиёев, шунингдек, Тошкентнинг “Бир камар, бир йўл” ташаббуси (BRI)даги иштирокини таъкидлади.

Мирзиёев ХХР раиси Си Цзинпин билан бўлажак учрашувда қўшма лойиҳалар ишлаб чиқиш муҳокама қилинишини қўшимча қилди. Хусусан, Тошкент янги узоқ муддатли кун тартиби ва истиқболли дастурларни ишлаб чиқиш ниятида.

Мунтазам инклюзив сиёсий мулоқот механизмларини яратиш, иқтисодиёт ва савдони ривожлантириш суръатларини ошириш шулар жумласидандир.