Солиқ тўлашда тадбиркорларга имтиёзлар берилади

Олий Мажлис Қонунчилик палатасига Солиқ кодексига қўшимчалар киритишни назарда тутувчи қонун лойиҳаси кириб келди, деб ёзмоқда Қонунчилик палатасининг матбуот хизмати.

Қонун лойиҳасида “20 минг тадбиркор – 500 минг малакали мутахассис” дастурига киритилган тадбиркорлик субъектлари барча солиқлар (қўшилган қиймат солиғи ва солиқ агентлари сифатида тўланадиган солиқлар бундан мустасно) ва божхона тўловларини таъминотсиз ва фоизсиз бир йилгача муддатга бўлиб-бўлиб тўлаш ҳуқуқи берилиши назарда тутилмоқда.

«Шунингдек, тадбиркорлик субъектлари томонидан “Ижтимоий ҳимоя ягона реестри”га киритилган фуқаролар ишга қабул қилинганда, 2025 йил 1 январга қадар тадбиркорлик субъектлари ушбу фуқароларга камида бир йил давомида ҳар ой меҳнатга ҳақ тўлаш энг кам миқдорининг бир баравари миқдоридан кам бўлмаган иш ҳақини тўлаб, бандлигини таъминлаган ва улар жами ишчилар сонининг камида 20 фоизини ташкил этганда, мол-мулк солиғи ва ер солиғидан имтиёз берилиши ҳам белгиланмоқда», – дейилади хабарда.

Мазкур имтиёзлар “20 минг тадбиркор – 500 минг малакали мутахассис” Дастурига киритилган тадбиркорлик субъектларига (Тошкент шаҳрида рўйхатдан ўтган тадбиркорлик субъектлари бундан мустасно) бир вақтнинг ўзида “Ижтимоий ҳимоя ягона реестри”га киритилган фуқароларни ишга қабул қилганда ва камида бир йил давомида ҳар ой меҳнатга ҳақ тўлашнинг энг кам миқдорининг бир баравари миқдоридан кам бўлмаган иш ҳақи тўлаб, бандлигини таъминлаганда, улар жами ишчилар сонининг камида 20 фоизини ташкил этганда берилиши кўзда тутилган.

«Агар тадбиркорлик субъектлари томонидан “ҳамкорлик шартномалари”да назарда тутилган мажбуриятлар бажарилмаган тақдирда, қўлланилган солиқ имтиёзлари бутун солиқ даври учун ушбу солиқларни тўлаш бўйича мажбуриятларнинг тикланиши билан бекор қилинади», – дейилади.

Қонун лойиҳаси айни пайтда Бюджет ва иқтисодий ислоҳотлар қўмитаси томонидан Қонунчилик палатасининг навбатдаги ялпи мажлисида биринчи ўқишда кўриб чиқиш учун киритишга тайёрланмоқда.

Аввалроқ, Солиқ мобил иловаси бир қатор қулайликлар билан бойитилганлиги ҳақида ёзгандик.