«Термиз — Мозори-Шариф — Қобул — Пешовар» йўналиши бўйича темир йўлни 5 йил ичида қуриш режалаштирилмоқда

“Термиз – Мозори Шариф – Қобул – Пешовар” йўналиши бўйича Трансафғон темир йўлни беш йил ичида қуриш режалаштирилмоқда. Бу ҳақда 26 июль куни Ўзбекистон транспорт вазирининг ўринбосари Жасурбек Чориев “Афғонистон: хавфсизлик ва иқтисодий тараққиёт” халқаро конференциясида маълум қилди, деб ёзади “Фергана” нашри.

Илгари ушбу темир йўл лойиҳасида иштирок этувчи давлатлар – Ўзбекистон, Покистон ва Афғонистоннинг ҳеч бири лойиҳани амалга оширишнинг аниқ муддатини айтмаган эди.

Чориевнинг сўзларига кўра, Трансафғон темир йўли трассаси бўйлаб ортофототасвирга олиш ишлари август ойи бошида бошланади (ҳолбуки аввалроқ Ўзбекистон томони бу тадқиқотлар 19 июлда бошланганини билдирганди). Суратга олиш ишлари ўзбекистонлик, покистонлик ва афғонистонлик мутахассислардан иборат гуруҳ томонидан амалга оширилади.

Сентябрь ойининг бошларида якунланиши керак бўлган йўналиш бўйича тадқиқотлар асосида техник-иқтисодий асослаш (ТИА) ишлаб чиқилади. Кейинчалик техник-иқтисодий асослаш асосида тендер ўтказиш учун ҳужжатлар ишлаб чиқилади, унинг натижаларига кўра Афғонистон орқали темир йўл қурилиши учун компания танланади.

Айни вақтда, Чориев таъкидлаганидек, Трансафғон автомобил йўлининг узунлиги 760 км бўлиши, у бўйлаб электр тармоғи ётқизилиши, йўналиш бўйлаб 136 та кўприк ва бошқа шунга ўхшаш иншоотлар, 3 та туннел қурилиши режалаштирилган.

Ўзбекистон жанубидаги Термиз шаҳри ва Афғонистон шимолидаги Мозори Шариф шаҳарларини боғловчи темир йўл 2011 йилдан буён ишламоқда. У орқали Ўзбекистон ҳозирда муҳтож афғонларга инсонпарварлик юкларини етказиб беряпти. Белгиланган темир йўл Трансафғон автомагистралининг бир қисмига айланади. Афғонистон орқали ўтадиган темир йўл қурилиши, сўнгги ҳисоб-китобларга кўра, 4,8 миллиард долларга тушади.

Лойиҳанинг амалга оширилиши товарларни Марказий Осиё, МДҲ ва Европага етказиб бериш муддатини сезиларли даражада қисқартиради. Покистондан Ўзбекистонга юк ташиш 35 кун эмас, балки 3-5 кун давом этиши кутилмоқда, товарларни етказиб бериш нархи қарийб уч баробарга арзонлашиши мумкин. Шу билан бирга, прогнозларга кўра, ушбу йўналиш бўйлаб юк ташиш ҳажми 10 миллион тоннага етиши мумкин.