Толиблар аста-секин ОАВда тирик мавжудотларнинг тасвирини намойиш этишни тақиқламоқда

Афғонистоннинг эзгуликни тарғиб қилиш ва иллатларнинг олдини олиш вазирлиги мамлакатнинг айрим вилоятларида Толибон ахлоқ кодексининг оммавий ахборот воситаларида тирик мавжудотлар тасвирини кўрсатишни тақиқловчи моддаси ижросини фаол назорат қила бошлади. Бу ҳақда Amu.tv хабар берди.

Хусусан, Ҳирот вилояти журналистлари ўтган ҳафта бўлиб ўтган Миллий заъфарон фестивали доирасидаги тадбирларни суратга олиш ва видеога олиш маҳаллий ҳокимият органлари томонидан тақиқланганини айтишмоқда.

Бироқ, маҳаллий манбаларга кўра, икки томонлама стандартлар ҳам бор. Масалан, яқинда Толибон томонидан тасдиқланган вилоят раҳбарининг ўринбосари камера олдида очиқ интервью берди, телевидениеда амалдорнинг видеоси намойиш этилди.

Шу билан бирга, радикал ҳаракат вакиллари сентябрь ойининг бошидан ноябрь ойининг ўрталарига қадар Афғонистоннинг яна бешта вилояти: Қандаҳор, Вардак, Таҳор, Бадғис ва Нангарҳорда тирик мавжудотларни суратга олишни тақиқлагани маълум.

Аммо Толибон чекловларни бутун Ислом Амирлигида кенгайтиришни режалаштираётганини яширмаяпти. Бу ҳақда France Press мухбирларига Эзгуликни тарғиб қилиш ва иллатларнинг олдини олиш вазирлигининг ходими Сейф-ул-Ислом Хабер маълум қилган.

Оммавий ахборот воситаларида кўпчилик бу сиёсатни ўзгача фикрлашни бостириш ва оммавий нутқни назорат қилишга қаратилган кенгроқ уринишнинг бир қисми деб ҳисобламоқда.

Журналист Мустафо Шаҳриёрга кўра, овоз ва тасвир жамият ҳақиқатини акс эттиради, агар улар олиб ташланса, Афғонистоннинг овози жим бўлади, халққа нисбатан қўйилган адолатсизлик ва чекловлар ҳақида ҳеч ким эшитмайди.

Журналистларни қўллаб-қувватлаш ташкилоти раҳбари ўринбосари Басир Аҳмад Донишёр ҳам тақиқда сиёсий сабабларни кўрмоқда.

“Бундай қарорлар ахборот оқимини чеклайди ва мавжуд режимнинг сўз эркинлиги устидан назоратни йўқотишдан кенгроқ қўрқишини акс эттиради”, – дейди у.

Инсон ҳуқуқлари ташкилотлари Толибоннинг сўнгги чекловлари Афғонистонда мустақил матбуотнинг янада яккаланишига олиб келади, деган журналист фикрига қўшилади.