Тошкент шаҳар ҳокими Бўрижар канали бўйлаб сайр ҳудуди лойиҳасини қайта кўриб чиқишни топширди

Тошкент шаҳар ҳокими Шавкат Умурзоқов дарахтларни кесишнинг олдини олиш мақсадида Бўрижар канали бўйлаб пиёдалар ҳудудини ташкил этиш лойиҳасини қайта кўриб чиқиш бўйича топшириқ берди. Тошкент шаҳрининг Яккасарой ва Чилонзор туманларидан оқиб ўтувчи ушбу канал бўйлаб қирғоқ ва пиёдалар ҳудудини ободонлаштириш режалаштирилган, дея хабар беради ҳокимликнинг матбуот хизмати.

Ҳоким 17 апрель куни қирғоқбўйи ҳудудига ташриф буюриб, лойиҳа билан танишди. Шунингдек, Бектемир туманидаги Олтинтопган маҳалласида бўлиб, “Хавфсиз шаҳар, хавфсиз ҳудуд, хавфсиз маҳалла” концепцияси доирасида куз-қиш мавсумига тайёргарлик кўриш, видеокузатув камераларини ўрнатиш чора-тадбирлари муҳокама қилинди.

Умурзоқов маҳаллани ободонлаштиришни яхшилаш, барча аҳоли учун тенг шароит яратиш мақсадида саноат корхоналарини жалб этишни таклиф қилди. Шунингдек, маҳаллий саноат зоналари учун махсус техникалар учун автотураргоҳлар, қўшимча жамоат транспорти тўхташ жойлари ва замонавий суғориш тизимини яратиш бўйича кўрсатмалар берди. Бундан ташқари, ҳоким максимал қувват билан ишлаётган тозалаш иншоотлари фаолиятини оптималлаштириш бўйича таклифларни ўрганди.