Тошкент шаҳар ҳокими янги Конституция лойиҳасини тарғиб қилиш учун ташвиқот гуруҳларини тузиш ҳақидаги қарорни имзолади

27 март куни Тошкент шаҳри ҳокими вазифасини бажарувчи Шавкат Умурзоқов Конституциянинг янги таҳрирдаги лойиҳаси моҳиятини аҳолига юқори савияда етказиш бўйича тарғибот гуруҳларини тузиш тўғрисида қарор қабул қилди. Бу ҳақда «Газета.uz» нашри ёзади.

Ҳужжатга кўра, Тошкент шаҳрининг маҳалла ва туманларида «Маънавияти юксак ва обрў-эътиборга эга» нуроний ва оқсоқоллар, жамоатчилик вакиллари, ёшлар, таълим, маданият, санъат, адабиёт соҳаси вакиллари ва ташкилотлар раҳбарларидан иборат тарғибот гуруҳлари тузилади. Бундан кўзланган мақсад Ўзбекистон Конституциясига киритилган ўзгартиш ва қўшимчалар ҳамда янги таҳрирдаги Конституция лойиҳасининг мазмун-моҳиятини кенг жамоатчиликка тўлақонли етказиш ҳисобланади.

Ҳоким Ўзбекистонда сиёсий тадбирларга тайёргарлик кўриш ва ўтказиш бўйича Тошкент шаҳридаги жамоат гуруҳининг 21 нафар вакилидан иборат таркибни тасдиқлади. Шавкат Умурзоқов Тошкент шаҳри туманлари тарғибот гуруҳининг 1080 нафар аъзосидан иборат рўйхатни ҳам тасдиқлади. Бундан ташқари, 11 минг нафардан ортиқ маҳалла фаоллари, жумладан, кўча боши, оқсоқоллар, уй раислари (домкомлар) ва бошқалар ташвиқот ишларига ёрдам беради.

Ҳокимлар ва кенгашлар қарорларини эълон қилувчи E-Qaror порталига кўра, янги таҳрирдаги Конституция лойиҳаси тарғиботи юзасидан гуруҳларни ташкил этиш бўйича бошқа вилоятларда ҳам шундай қарорлар (80 дан ортиқ) қабул қилинган. Бироқ бу ҳужжатларнинг аксарияти жамоатчиликдан яширилган.