Тошкентда “Биз Ботаника боғи тозалиги тарафдоримиз” акцияси ўтказилди

21 апрель куни “Юксалиш” ҳаракати, Ботаника боғи ходимлари, экология фаоллари, нодавлат нотижорат ташкилотлари вакиллари, кўнгиллилар, фаол фуқаролар билан биргаликда Golden House, Huawei ва GROSS компаниялари кўмагида “Биз Ботаника боғи тозилиги тарафдоримиз” акцияси ўтказилди. У Ер кунига бағишланди.

Ботаника боғига кўплаб меҳмонлар шаҳар шовқинидан дам олиш учун келади. Бироқ, ҳамма ҳам одоб қоидаларига риоя қилмайди ва ҳатто ҳудудда ахлат қолдириши ҳам мумкин.

Акциядан мақсад ушбу муаммога эътиборни қаратиш ва Ботаника боғининг аҳамиятини эслатишдир. Ахир, бу ахлат – ташланган пластик бутилкалар, этикеткалар ва пўчоқлар учун жой эмас. Бу биринчи навбатда илмий тўплам.

Ўтган якшанба куни ташриф буюрувчилар акцияни қўллаб-қувватлаш имкониятига эга бўлишди. Тадбирда мактаб ўқувчилари, талабалар, кўнгиллилар ва табиатни асрашга қизиқувчилардан иборат 90 га яқин киши иштирок этди. Улар яшил майдонни тозалашга қўшилиб, ахлат йиғишди. Энг фаол иштирокчиларга экоакция шиори ёзилган билагузуклар ва эко-сумкалар топширилди.

– Ботаника боғини чиқиндидан тозалаш акциясининг ташкил этилгани нафақат яшил ҳудуд қиёфасини яхшилаш, балки экотизим саломатлигини сақлаш йўлидаги муҳим қадам бўлди, – дейди “Юксалиш” ҳаракатининг фуқаролик жамияти институтлари билан ишлаш бўлими раҳбари Саида Мустафоева. — Тоза ботаника боғи нафақат гўзаллик, балки унинг барча аҳолиси ва ташриф буюрувчилари учун саломатлик демакдир. Тозалаш акцияси иштирокчиларда экологик масъулият ва онгни сингдиришга ҳам ёрдам беради. Шунингдек, ушбу тадбир доирасида Ботаника боғи қоидалари акс эттирилган ахборот белгилари янгиланди.

Ташриф буюрувчилар билан тушунтириш ишлари олиб борилди, уларга акция шиори ёзилган билагузуклар тарқатилди.

— Жамиятимизда АТ соҳасида ҳам мутахассислар, ҳам янги келганлар бор, биз талабаларимиз Ўзбекистоннинг фаол ҳаётида иштирок этишларини истаймиз. Тадбирга биздан ўндан ортиқ одам ташриф буюрди”, — дейди кўнгиллилардан бири, IT Community of Uzbekistan вакили Валентина Устинова.  – Биз ҳудудда жуда кўп пластмасса борлигини пайқадик ва уни йиғишга ёрдам бердик. Мен ходимлардан миннатдорман, улар баъзи дарахтлар ҳақида гапириб беришди, шунингдек, илмий тўпламга ташриф буюрувчилар келтириши мумкин бўлган зарарни таъкидлашди. Тадбир нафақат экологик, балки маърифий аҳамиятга ҳам эга бўлди. Фарзандларим билан келдим, улар учун ҳам экоакцияда иштирок этиш катта воқеага айланди.

“Биз Ботаника боғи тозалиги тарафдоримиз!” акцияси атроф-муҳитга масъулият билан муносабатда бўлиш муҳимлигини, шунингдек, шаҳримизнинг табиий бойликларини асраб-авайлашда биргаликда ҳаракат қилиш зарурлигини барчага эслатди.

Маълумот учун: Ботаника боғида 4500 дан ортиқ турдаги дарахт, гул ва бошқа ўсимликлар мавжуд. Бу ерда Марказий ва Шарқий Осиё, Шимолий Америка ва Европа, Кавказ ва Узоқ Шарқ флорасининг хилма-хиллигини акс эттирувчи бир нечта ландшафт зоналари мавжуд. Бу бутун оила билан сайр қилиш учун ажойиб жой, лекин табиатга масъулият билан муносабатда бўлиш кераклигини унутмаслик лозим.