Тошкентда боланинг ўмров суягини синдирган энагага нисбатан жиноят иши қўзғатилди

Ўзбекистон Болалар омбудсмани матбуот хизмати Тошкент шаҳрининг Яккасарой туманидаги хусусий болалар боғчасида боланинг чап ўмров суягини синдириб қўйган энагага нисбатан жиноят иши қўзғатилгани ҳақида хабар беради.

Ҳодиса 30 ноябрь куни тарбиячи болани бир қўли билан ушлаб, бошқа каравотга ўтказиш учун кўтарганида содир бўлган. Кейинроқ боланинг ота-онаси уни боғчадан олиб кетишган, чунки у йиғлаб, чап қўлидаги оғриқдан шикоят қилган. Касалхонада чап ўмров суягининг ёпиқ синиши аниқланган.

18 декабрь куни терговга қадар текширув вақтида ўтказилган тиббий экспертизада бола ўртача оғирликдаги тан жароҳати олгани аниқланган.

Мазкур ҳолат юзасидан Ўзбекистон Жиноят кодексининг 116-моддаси 1-қисми (шахснинг ўз касб бурчини эҳтиётсизлик ёки инсофсиз муносабатда бўлиши оқибатида баданга ўртача оғир ёки оғир шикаст етказиш) билан жиноят иши қўзғатилган. Ушбу моддада назарда тутилган жазо уч йилгача муайян ҳуқуқдан маҳрум қилиш, 300 соатгача мажбурий жамоат ишлари ёки икки йилгача ахлоқ тузатиш ишлари бўлиши мумкин.