Тошкентда “Яшил шаҳар” транспорт йўлаги ташкил этилади

Ўзбекистон Республикаси Транспорт вазирлиги ва Бирлашган Миллатлар Ташкилоти Тараққиёт Дастурининг Ўзбекистондаги Ваколатхонаси ҳамкорлигида “Тошкент – Кам углеродли автотранспортга инвестициялар жалб этишни жадаллаштириш (TAILEV)” лойиҳаси доирасида “Яшил шаҳар” транспорт йўлагининг тақдимоти бўлиб ўтди, деб хабар беряпти вазирлик матбуот хизмати.

Президентнинг 2023-йил 16-февралдаги “Жамоат транспорти тизимини ислоҳ қилиш чора-тадбирлари тўғрисида”ги ПҚ–59-сон қарорига мувофиқ 2025-йилгача Тошкент шаҳри бўйича жамоат транспорти доимий ҳаракатланадиган умумий узунлиги 475 км бўлган 36 та алоҳида автобус йўлакларини ташкил этиш белгиланган бўлиб, лойиҳа доирасида пойтахтнинг Шота Руставели кўчасида жорий этилиши режалаштирилган яшил транспорт йўлагининг концепт-дизайни, математик модели ва унинг асосида техник иқтисодий асоси ишлаб чиқилди.

«Мазкур ташаббусни қўллаб-қувватлаш ва автобус йўлакларини хавфсиз ҳамда самарали жорий этишга кўмаклашиш мақсадида TAILEV лойиҳа доирасида пойтахтнинг Шота Руставели кўчасида жорий этилиши режалаштирилган яшил транспорт йўлагининг концепт-дизайни, математик модели ва уни асосида техник иқтисодий асослари ишлаб чиқилди», – дейилган хабарда.

Мазкур йўлак лойиҳасини ишлаб чиқишда йўловчи ва аҳолини фикри ўрганилиб, ногиронлиги бўлган шахслар, қариялар, болалар ва аёлларнинг жамоат транспорти инфратузилмасига бўлган эҳтиёжлари инобатга олинган.

«Техник-иқтисодий асосларга кўра мазкур йўлакни жорий этилиши натижасида йўлак бўйлаб автотранспортнинг ўртача тезлиги 11 фоизга ошиши, атмосфера ҳавоси ифлосланиши 12.3 фоизга қисқаришига эришилиши ҳисоблаб чиқилди», – дейилган.

Шунингдек, бир кунда йўлак бўйлаб автобусда ҳаракатланадиган барча йўловчилар ҳамда шахсий транспорт эгаларининг тежалган умумий вақти 3318 соатни, тежалган ёқилғи йилига 2.6 миллион литрни ташкил этиб, бу йилига 21.2 миллиард сўм иқтисодий самарага олиб келиши ҳақида маълумот берилди.

Ишлаб чиқилган лойиҳалар ва техник-иқтисодий асослар Тошкент шаҳар ҳокимлигига киритилди.