Тошкентдаги “Мовий гумбазлар” истироҳат боғи ёнидаги китоб расталари бузилиши мумкин

Тошкентдаги «Мовий гумбазлар» боғида жойлашган очиқ осмон остидаги китоб расталарида ишлаётган сотувчилар қаторлар бузилиши мумкинлиги ҳақидаги хабардан хавотирда. Улар Ўзбекистон президенти Шавкат Мирзиёевга видеомурожаат ёзиб, унда узоқ вақтдан бери шаҳарнинг ташриф қоғозларидан бирига айланган пойтахтдаги ягона эски китоблар бозорини сақлаб қолишни сўрашган, деб ёзади «Газета.uz» нашри.

Давлат раҳбарига мурожаат қилишга Миробод тумани ҳокимлигининг китоб қаторлари эгаллаб турган жойни кимошди савдосига қўйиш режаси сабаб бўлди. Мурожаат пайдо бўлганидан кейин ҳокимлик матбуот хизмати хабарида участкани K-SAVDO (кўчма савдо объектларини сотиш ва уларни рўйхатдан ўтказиш бўйича аукцион платформаси) орқали сотувга қўйиш масаласи тегишли ташкилотлар билан келишилгани, бироқ ҳозирча аукционга қўйилмаганини маълум қилди.

Ҳокимлик, шунингдек, маъмурият мутасаддилари аввалроқ сотувчиларга участкани қонун ҳужжатларига мувофиқ рўйхатдан ўтказиш кераклигини тушунтиришганини билдирди.

«Икки ҳафта олдин туман ҳокимлигидан одамлар келиб, бу жой кимошди савдосига қўйилиши ҳақида айтишди. Бизда бу жойни сотиб олишга унчалик пулимиз йўқ ва бизни шунчаки ҳайдаб юборишларидан қўрқамиз», — дейди нашрга сотувчи аёллардан бири.

Сотувчи аёлларнинг айтишича, уларга ҳар йили давлат томонидан белгиланган маълум бир маблағ эвазига белгиланган участкада савдо қилиш имконини берувчи дислокация тўғрисидаги ҳужжат берилган. Коронавирус пандемияси муносабати билан жорий этилган карантиндан кейин дислокация бериш тўхтатилган, бироқ сотувчилар солиқ тўлашдан давом этишган.

Сотувчилар ишсиз қолишдан қўрқишаётганини айтишди. Бу ерга Ўзбекистоннинг турли бурчакларидан китоб олиш учун келишади. Бу ерда ҳам янги, ҳам эски ва узоқ вақтдан бери нашр этилмаган нодир китобларни топиш мумкин.

Аксарият сотувчилар йиллар давомида ўзларининг доимий мижозларига эга бўлишган, улар бу ердан керакли китоб ва журналларни буюртма қилишади. Сотувчилар у ёки бу нашр ўзларида бўлмаса, харидорларга, рақобатчи бўлишларига қарамасдан, бошқа ҳамкасблари билан боғланишни маслаҳат беришади.

Куннинг иккинчи ярмида китоб дўкони ходимлари Миробод тумани ҳокими Шуҳрат Пўлатов билан учрашди. Уларни тинглаб, душанба куни шу ерга келиб, бу масалани атрофлича муҳокама қилишга ваъда берди.