UzAuto Motors иш вақти якунлангани сабаб шартнома беришни эртанги кунга қолдирди

Куннинг иккинчи ярмидан оммабоп автомобиллар учун шартномалар беришни бошлаб, сайти техник носозликларга учгаран UzAuto Motors иш вақти якунлангани сабабли шартнома беришни эртага, яъни 26 декабрь соат 10:00 га қадар тўхтатганлигини маълум қилди.

«Контрактация очилган вақтдан бошлаб, 25-декабрь соат 19:40 ҳолатига кўра, UzAutoSavdo платформасидан фойдаланган ҳолда жами 31 500 дан ортиқ шартномалар муваффақиятли тузилди. UzAutoSavdo онлайн-савдо тизими 7 000 та киберҳужум кузатилди. Умуман олганда, тизимда ушбу вақт оралиғида 3 миллиондан ортиқ фаол сеанслар қайд этилган», – дейилади хабарда.

Ушбу давр мобайнида компаниянинг Call-маркази томонидан 2100 та мурожаатлар қабул қилиниб, кўриб чиқилди. Агар сизда саволлар туғилса, ҳар қандай ҳолатларда call-марказга мурожаат қилишингиз мумкин.

«Шунингдек, иш вақти тугаганлиги сабабли шартнома тузиш жараёни вақтинча тўхтатилди. Онлайн контрактация 26-декабрь куни соат 10:00 да қайта тикланади», – дейилган.

Бироз аввал, UzAuto Motors томонидан бугун қайта тикланган шартнома бериш жараёни, ундаги носозликлар ва фуқароларнинг бунга муносабатини эълон қилгандик.