Uzbekistan Airports Олий судга кассация шикоятини тақдим этмоқчи

Ўзбекистон Рақобатни ривожлантириш ва истеъмолчилар ҳуқуқларини ҳимоя қилиш қўмитаси «Тошкент» халқаро аэропорти ҳудудига таксиларнинг кириши билан боғлиқ вазиятни ўрганиш натижалари ҳақида маълум қилди.

Қўмита 2022 йил сентябрь ойида ягона такси хизмати йўлга қўйилганидан сўнг аэропортда тўхташ учун тўловлар оширилгани ва бошқа ташувчиларнинг киришига “сунъий тўсиқлар ўрнатилиши” сабабли истеъмолчилардан шикоятлар келиб тушганини маълум қилди. Такси оператори Uzbekistan Airports томонидан кимошди савдоси натижасида танланди. Uzbekistan Airports қўмитанинг буйруғини бекор қилишга эришиш ниятида эканини билдирмоқда.

2022 йил август ойида Uzbekistan Airports E-auksion.uz сайтида қонун ҳужжатларига мувофиқ – Тошкент халқаро аэропортининг учиб келиш терминалида такси хизмати учун жой ажратиш бўйича лот ўрнатди. Лотга бир қатор мажбурий ҳужжатлар, жумладан, техник топшириқлар бириктирилган.

Унга кўра, такси хизмати бензин ёки электр қувватида ишлайдиган транспорт воситаларига эга бўлиши лозим, сабаби аэропорт ҳудудида газ қатъиян тақиқланган. Шунингдек, такси хизмати йўловчилардан барча шаклларда тўловларни қабул қилишни таъминлаши керак. Ҳайдовчиларга ҳам мажбурий талаблар қўйилган – ягона форма, озода кўриниш, ўзбек, рус ва инглиз тиллари асосини билиш.

Uzbekistan Airports аукцион ҳақида расмий веб-сайт ва ижтимоий тармоқларда, қатор ОАВларда ҳам маълумотлар эълон қилган. Натижада аэропортда фаолият юритиш ҳуқуқи учун аукционда учта компания иштирок этди. Bobur Diyor компанияси эса ғолиб деб топилди. Компаниянинг талабларга мувофиқлиги текширилгач, у билан шартнома тузилди. 2022 йил 12 сентябрдан аэропортда Airport Tashkent Taxi бренди остида ягона такси хизмати иш бошлади

2022 йил 23 декабрда Рақобатни ривожлантириш ва истеъмолчилар ҳуқуқларини ҳимоя қилиш қўмитаси Uzbekistan Airports компаниясига лицензияга эга бўлган барча такси компанияларининг талабларга жавоб берадиган машиналари учун аэропортга тенг кириш ҳуқуқини таъминлаш бўйича мажбурий кўрсатмалар берди.

«Ваҳоланки, бугунги кунда Тошкент шаҳрида юзлаб такси компаниялари мавжуд бўлиб, уларда минглаб турли маркадаги, турли йилларда ишлаб чиқарилган, турли ҳолатда ва газда юрадиган автомобиллар мавжуд. Аэропорт ҳудудига киришда уларнинг тоифаланган объектнинг талабларига мувофиқлигини текшириш шунчаки имконсиз. Шу муносабат билан “Узбекистан Аирпортс” таксилар билан боғлиқ вазиятни бартараф этиш ва йўловчилар мурожаатларини инобатга олиб, такси хизматларини кўрсатиш бўйича ягона хизматни танлашга қарор қилди. Акс ҳолда, аэропортда тартибни таъминлашнинг иложи йўқ эди», – дея таъкидлайди компания.

Ушбу важлар билан Uzbekistan Airports қўмита қарорига эътироз билдириш мақсадида Тошкент шаҳар туманлараро маъмурий судига мурожаат қилди.

«Аммо суд бу далилларни инобатга олмай 28 мартдаги қарори билан қўмита кўрсатмаларини ўз кучида қолдирган. 12 июнь куни компаниянинг қайта аризаси ҳам қаноатлантирилмади. Суд ва қўмита Uzbekistan Airports компаниясининг яна бир қанча такси хизматларини кўрсатувчи компанияларни аукционга қўйиш қарорини ҳисобга олмади. Яқин кунларда E-auksion.uz сайтида яна учта – Тошкент халқаро аэропортининг умумий учиш залида, CIP учиш залида, шунингдек, маҳаллий авиақатновлар терминалида яна бир нуқта очиш бўйича лот жойлаштирилади. Бу ҳақда Uzbekistan Airports расмий сайти ва ижтимоий тармоқларида қўшимча хабар қилинади».

Компаниянинг таъкидлашича, ягона такси хизмати фаолият кўрсатган йил давомида аэропорт ва ушбу фаолият билан шуғулланувчи компанияга бирорта ҳам шикоят келиб тушмаган, аксинча, йўловчилар доим ижобий фикр билдиришмоқда.

«Бир йил олдинги ҳолатга қайтадиган бўлсак: ижтимоий тармоқлар ва турли идораларга, Президентнинг Виртуал қабулхонасигача аэропортни тозалаш талаби билан доимий мурожаатлар келиб тушган. Эски машиналар, одобсиз ҳайдовчилар, қиммат нархлар, шунингдек, бир неча талончилик ва йўловчиларни калтаклаш ҳолатлари – бугун Uzbekistan Airports буларнинг барчасини ҳеч бўлмаганда ўз ҳудудидан сиқиб чиқаришга муваффақ бўлди. Энди йўловчи расмий такси хизматларидан фойдаланиши ёки такси агрегаторлари Яндех, MyTaxi ва ҳоказоларни энг яқин автотураргоҳга (терминалдан 50-100 метр масофада) чақириши мумкин, у ерда эса таксилар учун 10 дақиқа бепул туриш вақти берилади».

Бундан ташқари, Uzbekistan Airports Олий судга кассация шикояти билан, шунингдек, такси хизматлари учун янги компанияларни танлаш йўли билан, қўмитанинг буйруғини бекор қилиш учун мурожаат қилмоқчи.