“Uzbekistan Airways” Сариосиё аэропортига илк синов парвозини амалга оширди

“Uzbekistan Airways” миллий авиакомпанияси “Сариосиё” аэропортига биринчи синов парвозини амалга оширди, деб хабар қилди Транспорт вазирлиги матбуот хизмати.

5 январ куни Транспорт вазирлиги, Фуқаро авиацияси агентлиги, “Uzbekistan Airways” ва “Uzbekistan Airports” миллий авиакомпанияси вакиллари Тошкент – ​​Термиз – Сариосиё – Тошкент йўналиши бўйича Let L-410 самолётида илк синов парвозини амалга оширди.

Ишчи гуруҳ Сариосиё аэропортининг халқаро ICAO талабларига мувофиқлиги ва ATR-72 самолётларини қабул қилиш имкониятини ўрганди.

Сариосиё ҳаво бандаргоҳида йўловчи терминали қурилади.

Туризм қўмитаси ва Сурхондарё вилояти ҳокимлиги маҳаллий аҳоли ва сайёҳлар учун ATR-72, Let L-410 ва кичикроқ самолётларда Сариосиё аэропортига мунтазам қатновларни ташкил этишни режалаштирмоқда.