Ер майдонларини олиб беришни ваъда қилганлар ушланди

Қашқадарё вилояти прокуратураси томонидан ИИБ ходимлари билан ҳамкорликда ўтказилган тезкор тадбирда фуқаро Д.Е. фуқаро Д.С.нинг ишончига кириб, гўёки ҳокимият ва кадастр идораларида ишловчи танишлари ёрдамида Қарши тумани “Отчопар” МФЙ ҳудудида жойлашган бошқа бир фуқаро Б.Р.га иссиқхона қуриш учун ажратилган 2,5 гектар ер майдонини 45 000 АҚШ доллари эвазига унинг номига расмийлаштириб олиб беришини ваъда қилган. Жиноятчи ушбу пуллар ҳисобидан 63 млн сўмни олган вақтида ашёвий далиллар билан ушланган.

“Департамент ҳамда ДХХнинг Оқдарё тумани бўлимлари томонидан ўтказилган тезкор тадбирда эса фуқаро Ж.Ф. фуқаро А.Э.га гўёки юқори лавозимда ишловчи танишлари ёрдамида “Даҳбет” МФЙ ҳудудидан 30 000 АҚШ доллари эвазига 10 сотих ер майдонини расмийлаштириб олиб беришини ваъда қилиб, олдиндан 10 000 АҚШ долларини олган пайтда ушланган”, – дейилади хабарда.

Департаментнинг Қорақалпоғистон Республикаси бошқармаси, ДХХ ва ИИВ ходимлари ҳамкорлигида ўтказилган тезкор тадбирда фуқаро Х.А. фуқаро Б.Т.га Нукус шаҳри “Ботаника боғи” МФЙ ҳудудидаги 4 сотих ер майдонини гўёки бошқа бир фуқаро Ш.Д.га ажратилганлиги тўғрисида сохта ҳужжатларни кўрсатиб, ушбу ер майдонини фуқаро Б.Т.га 160 млн сўмга сотаётган вақтида далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.