Ўзбекистон Афғонистон орқали Покистонга транзит юк ташишни кенгайтиришни режалаштирмоқда

Ўзбекистон Республикаси транспорт вазири Илхом Махкамов ва Президентнинг Афғонистон бўйича махсус вакили Исматулла Иргашев юк ташиш ва транзит масалаларини муҳокама қилиш учун Афғонистонга ташриф буюрди. Томонлар Афғонистон ва Покистон орқали Ҳинд океани портларига чиқиш учун халқаро транспорт йўлагини шакллантириш, икки давлат транспорт логистика корхоналари ўртасидаги ҳамкорликни мустаҳкамлаш, халқаро автомобил ташувчилари учун қулай шарт-шароитлар яратиш, жумладан, Афғонистон орқали транзит ва юкларни бошқа мамлакатларга ташиш бўйича чекловларни олиб ташлаш масалаларини муҳокама қилдилар.

Учрашув якунида томонлар икки мамлакат ўртасида транзит юк ташишни ривожлантириш учун барча имкониятларни сафарбар этишга келишиб олдилар.

TOLONewsнинг сўзларига кўра, Ўзбекистон инвестициялар, саноат ва савдо вазирининг биринчи ўринбосари Нозимжон Холмуродов ҳам Афғонистонга ташриф буюриб, қўшимча қулайликлар яратиш, виза бериш ва гуманитар ёрдам кўрсатиш масалаларини муҳокама қилган.

Савдо ва саноат вазирлигининг Афғонистон муваққат ҳукуматидаги вакили Охундзада Абдул Салам учрашувда Афғонистоннинг турли соҳаларига, шунингдек, конларга инвестициялар киритиш бўйича муҳокамалар бўлганлигини таъкидлайди.

Афғонистон саноат ассоциацияси директори Абдул Жабар Сафининг айтишича, делегация расмийлар билан Афғонистонга электр энергияси етказиб бериш масаласини ҳам муҳокама қилишган.

«Муҳим янгилик шундаки, саноат ва савдо вазирлиги [Афғонистон] Ўзбекистондан электр энергиясини импорт қилиш ҳажмини ошириш бўйича иш олиб бориши керак. Саноат корхоналари ва инвесторлар фаолияти энергияга боғлиқ», дейилади хабарда.