Ўзбекистон АИ-80 бензинидан воз кечишни режалаштирмоқда

Xabar.uz Ўзбекистонда экология, айниқса, Тошкент шаҳрида жиддий муаммога айланиб бораётганини ёзмоқда. Табиийки, автомобилларнинг ҳиссаси ҳам жуда катта.

Ўзбекистонда 4,5 миллионга яқин автомобил мавжуд бўлиб, шундан 700 мингтасидан Тошкентда фойдаланилади. Кўп автомобилларнинг бир жойда тўпланиши атроф-муҳитга таъсир қилмай қолмайди. Аксарият автомобилларнинг АИ-80 бензинида ишлаши муаммони янада мураккаблаштиради. Хусусий ишлаб чиқарувчилар томонидан белгиланган стандартларга риоя қилмаслик – алоҳида масала.

Вазирлик матбуот хизмати хабарига кўра, айрим тадбиркорлар томонидан бензин ишлаб чиқаришда экологик талаблар қўпол равишда бузилган. Натижада кўплаб зарарли кимёвий моддалар чиқарилади.

Маълум қилинишича, бундай бензин ишлаб чиқариш тўхтатилган.

Бошқарма матбуот хизмати бир масалага эътибор қаратишни сўради: АИ-80 русумли бензин кўплаб мамлакатларда тақиқланган, нефт маҳсулотларини тўлиқ импорт қилувчи қўшни давлатларимиз – Қирғизистон ва Тожикистонда ҳам истеъмолдан олиб ташланган. Айтиш жоизки, ҳозирда минтақада фақат биз ва қўшни Афғонистон АИ-80 бензинидан фойдаланишда давом этмоқда.

Вазирлик Аи-80 Ўзбекистонда ҳам фойдаланишдан чиқариш режалаштирилганини маълум қилди. Масалан, 2025 йилгача Фарғона нефтни қайта ишлаш заводида АИ-80 ишлаб чиқариш тўхтатилади, 2026 йилгача эса Бухоро нефтни қайта ишлаш заводи тўлиқ сифатли ёқилғи ишлаб чиқаришга ўтказилади.