Ўзбекистон чегарада можароларнинг олдини олиш учун 120 та мобил гуруҳни ташкил қилди

Ўзбекистон чегараларига хавфсизлик кучларининг 120 та мобил гуруҳи жўнатилди. Бу ҳақда 31 октябрь куни Ўзбекистон Сенатида бўлиб ўтган давра суҳбатида маълум қилинди, деб ёзади “Фергана” нашри.

Тадбир “Ватан сарҳадларини қўриқлашда чегара қўшинлари, мудофаа, божхона хизмати, ички ишлар органлари ва маҳалланинг ўзаро ҳамкорлиги асосий йўналишлари: тажриба, натижалар ва истиқболдаги вазифалар” мавзусига бағишланди. У Сенатнинг Мудофаа ва хавфсизлик масалалари қўмитаси томонидан ўтказилди.

Давра суҳбатида “Қўшни давлатларда юзага келган кескин ижтимоий-сиёсий вазиятнинг мамлакатимизга таъсирининг олдини олиш мақсадида” мобил гуруҳлар ташкил этилгани маълум қилинди. Унга Ўзбекистон Ички ишлар вазирлиги, Давлат хавфсизлик хизмати, Миллий гвардия ва Мудофаа вазирликлари ходимлари киргани маълум қилинди.

Гуруҳларнинг вазифалари “Оператив-криминоген ва ижтимоий-сиёсий вазият барқарорлигини таъминлаш, аҳоли тинчлиги ва осойишталигини таъминлаш, турли кўринишдаги жиноят ва ҳуқуқбузарликларнинг олдини олиш” этиб белгиланган.

Ўзбекистоннинг чегарадош вилоятларида 541 та фуқаролар йиғини мавжуд бўлиб, уларда жами 1,6 миллионга яқин аҳоли истиқомат қилади.

Жумладан, беш минг нафардан ортиқ ички ишлар органларида профилактик ҳисобда турганлар, жумладан, муқаддам судланганлар (902 нафар), диний экстремистик оқим аъзолари (330 нафар), ҳуқуқбузарлик содир этган вояга етмаганлар (94 нафар).

Йил бошидан буён чегара ҳудуди аҳолиси билан мингдан ортиқ профилактик учрашувлар ўтказилиб, уларда чегара қоидаларига риоя қилиш, ушбу ҳудудларда шубҳали шахслар ва ҳолатлар тўғрисида маҳаллий ҳуқуқ-тартибот идораларини хабардор қилиш муҳимлиги ҳақида сўз юритилди.

Жорий йилнинг март ва август ойларида барча чегарадош аҳоли пунктларида хавфсизлик кучлари томонидан «Чегара-тозалаш» тезкор-профилактика тадбирлари ўтказилди. Хавфсизлик кучлари чўпонлар, овчилар ва ўрмон хўжалиги ходимлари билан биргаликда чегара, тоғли ва бориш қийин бўлган ҳудудларда 2154 марта разведка ва қидирув ишларини олиб борди.