Ўзбекистон президенти француз компанияларининг вакиллари билан қандай лойиҳаларни муҳокама қилди

Ўзбекистон президенти Самарқандда ўтказилаётган Ўзбекистон-Франция бизнес-форуми доирасида француз компанияларининг вакиллари билан учрашди.

“Meridiame” компанияси раиси Тьерри До билан учрашув жараёнида давлат раҳбари компаниянинг “Янги Тошкент”ни барпо этиш доирасида инфратузилмавий лойиҳаларни амалга ошириш истиқболларини муҳокама қилди.

Шавкат Мирзиёев ва Тьерри До. Фотосурат: president.uz

Шавкат Мирзиёев “EDF” компанияси раиси ва бош директори Люк Ремон билан учрашув ўтказди ва компаниянинг Сирдарё ва Сурхондарёдаги буғ-газ электр станцияларини қуришда иштирок этаётганини қўллаб-қувватлади, лойиҳаларни амалга оширишни жадаллаштириш муҳимлигини таъкидлади.

Ўзбекистон президенти  “Lactalis” компанияси раиси Эммануэль Бенье билан учрашди ҳамда компаниянинг Наманганда сут маҳсулотларини ишлаб чиқаришни йўлга қўйиш борасидаги режаларини қўллаб-қувватлади.

“Boehringer Ingelheim” компанияси раиси Кристиан Вижсен билан учрашув давомида томонлар биргаликда онкологик дори воситаларини ишлаб чиқаришни ташкил этиш истиқболларини кўриб чиқишди.

Шавкат Мирзиёев Франция тараққиёт агентлиги раҳбари Реми Риу билан ҳам учрашув ўтказди. У агентликнинг бюджетни қўллаб-қувватлаш ва ҳамкорлик доирасидаги лойиҳаларнинг техник-иқтисодий асосларини ишлаб чиқиш бўйича битимлар имзолаш ташаббусини қўллаб-қувватлади.