Ўзбекистонда давлат активларини хусусийлаштириш жараёни тезлаштирилади

Президент “Иқтисодиётда давлат иштирокини қисқартиришнинг қўшимча чора-тадбирлари тўғрисида”ги қарорни имзолади. Унга кўра кимошди савдосига 247 та корхона ва 1028 та кўчмас мулк объектидаги давлат улушлари қўйилади.

Маҳаллий фонд бозорида 12 та йирик корхонанинг давлат акцияларини бирламчи ва (ёки) иккиламчи жойлаштириш амалга оширилади:

• “Ўзбектелеком”, “Ўзбекгидроэнерго”, Олмалиқ КМК, “Ўзбекгеологияқидирув”, “Ўзбекгеофизика” – 2 фоиздан;
• товар ва хомашё биржаси – 2,4 фоиз
• “Темирйўлкарго”, “Ўзтемирйўлконтейнер” – 4 фоиздан;
• “Тошкент” РФБ, “Ўзбекистон почтаси”, UzAuto Motors Powertrain, Электрон онлайн аукционларни ташкил этиш – 5 фоиздан.

Давлат активларини сотишни жадаллаштириш ва иқтисодиётда хусусий секторнинг улушини ошириш мақсадида қуйидагилар белгиланди:

• давлат активлари 3 ой ичида сотилмаса (Тошкент ва вилоят марказлари бундан мустасно), уларнинг бошланғич қиймати босқичма-босқич 10 фоизгача пасайтирилади;
• тадбиркорларга 2024 йил 1 январгача тузилган ва ижара муддати камида 5 йил бўлган лизинг шартномалари асосида ижарага олинган ҳолда хусусийлаштириш дастурига киритилган давлат мулкини тахминий қийматда бевосита сотиб олиш ҳуқуқи берилади;
• давлат кўчмас мулкини бўлиб-бўлиб сотиб олувчи харидорлар ер ва мол-мулк солиғини ушбу объектларни тасарруф этиш ҳуқуқи тўлиқ ўтказилганидан кейин тўлайди.

Қишлоқ хўжалигига мўлжалланмаган ер участкаларини сотишни тезлаштириш мақсадида қуйидаги тартиб ўрнатилади:

• ноқишлоқ хўжалиги мақсадларидаги ер участкаларининг (Тошкент ва вилоят марказларидан ташқари) бошланғич қиймати 3 ой ичида сотилмаса, 30 фоизгача, 6 ой ичида эса 10 фоизгача пасайтирилади. Шунингдек, тўловларнинг 15 фоизини 3 ойда, қолганини эса 10 йилгача бўлиб-бўлиб тўлаш имконияти мавжуд;
• 4 ва 5-тоифали ҳудудларда жойлашган давлат мулки ҳамда мулк ҳуқуқи асосида олинган ер участкалари учун тўловлар 5 йил давомида тенг улушларда тўланади. Олинган ер участкаларини таъминлаш учун зарур бўлган 35 фоизлик дастлабки тўлов 15 фоизгача пасайтирилди.