Ўзбекистонда фавқулодда вазиятлар сони 34%га камайган

Жорий йилда фавқулодда вазиятлар сони 34%га камайишига эришилди. Бу ҳақда АОКАда ФВВ бошқарма бошлиғи Фурқат Абдуқодиров иштирокида ўтказилган брифингда маълум қилинган. Шунингдек, тизимда 2023 йилдаги устувор вазифалари ижроси ҳақида маълумот берилди.

Жумладан, сел-тошқинларини олдини олиш бўйича 211 та махсус-тактик ўқув машқи ўтказилиб, 105 км.дан ортиқ масофада ички ариқ ва магистрал каналлар тозаланди.

«Шунингдек, жорий йилда янги қурилган 12 та ва капитал таъмирланган 4 та жами 16 та ёнғин-қутқарув қисми фойдаланишга топширилган. Шу билан бирга 50 га яқин ёнғин ўчириш ва махсус автомобиллар сотиб олиниб, хизматга жалб этилди», – дейилади.

Оммавий ахборот воситаларида тарғибот ишларини ташкил этиш юзасидан жами 13 024 та телекўрсатув, 264 140 та радиоэшиттириш, газета ва журналларда 6 509 та мақолалар, веб-сайтларда 31 614 та материал жойлаштирилганига тўхталиб ўтилди.

«Амалга оширилган ишлар натижасида 2022 йилга нисбатан 2023 йилда фавқулодда вазиятлар сони 34% яъний 44 тага камайишига эришилди», – дейилади хабарда.

Бугунги кунда вазирлик шахсий таркиби аҳолини фавқулодда вазиятлардан муҳофаза қилиш ва ёнғин хавфсизлигини таъминлаш тадбирларига сафарбар этилган бўлиб, бу борадаги ишлар самарадорлигини оширишнинг чоралари кўрилмоқда.