Фарғона водийсида аёллар ҳуқуқлари билан боғлиқ ишлар қай аҳволда

Фуқаролик ташаббусларини қўллаб-қувватлаш марказининг Фарғона вилояти бошқармаси ЮСАИД билан ҳамкорликда “Мулоқот ва ривожланиш форуми”да тақдим этилган Фарғона, Наманган ва Андижон вилоятларида хотин-қизларнинг сиёсий, ижтимоий ва меҳнат соҳаларидаги аҳволига оид шарҳини эълон қилди.

Форумдан кўзланган мақсад ҳудуддаги хотин-қизлар аҳволини яхшилаш учун давлат органлари, фуқаролик жамияти ташкилотлари ва халқаро ташкилотлар ўртасида мулоқот ва шерикликни мустаҳкамлашдан иборат. Форум иштирокчилари хотин-қизларнинг аҳволини яхшилаш бўйича тавсияларни муҳокама қилиб, уларни амалга ошириш бўйича аниқ чора-тадбирларни ишлаб чиқди. Мазкур тадбирда ҳудудий мулоқот доирасидаги ҳамкорлик ва тажриба алмашиш муҳимлиги таъкидланди.

Гендер тенглиги ва қонунчилик ташаббуслари

Сўнгги йилларда Ўзбекистон ҳукумати ислоҳотлар ва янги қонун ҳужжатларини жорий этиш орқали хотин-қизларнинг мавқеини ошириш бўйича салмоқли қадамлар ташлади. Сиёсий, ижтимоий ва меҳнат соҳаларида тенг имкониятларни таъминлашга қаратилган “Аёллар ва эркакларнинг тенг ҳуқуқ ва имкониятларининг кафолатлари тўғрисида”ги қонун шулар жумласидандир.

Муаммолар ва ютуқлар

Қонунчиликдаги ютуқларга қарамай, ҳудудларда аёлларнинг ҳақиқий аҳволи оғирлигича қолмоқда. Маданий эътиқодлар ва анъанавий муносабатлар кўпинча аёллар ҳуқуқларини амалга оширишда тўсиқларга айланади. Масалан, аёлларни камситиш, эркакларникига нисбатан чекланган имкониятларга дуч келган меҳнат ва бандликдаги тенглик масалалари долзарблигича қолмоқда.

“Жамият ўн йиллик стратегияларни чексиз қабул қилиши, йўл хариталарини ишлаб чиқиши, аёлларнинг имкониятларини кенгайтириш ҳақида мақолалар ёзиши мумкин, бироқ биз кенг жамоатчилик, айниқса, эркаклар бу йўналишда олиб борилаётган сиёсатнинг мазмун-моҳиятини тўғри тушунмагунича ҳеч қачон ўз мақсадларимизга эриша олмаймиз. Бу режа ва тадбирларни амалга оширишга жамоатчиликни, хусусан, эркаклар ва ўғил болаларни жалб этиш уларнинг самарадорлигини янада оширади, – дейди “Фуқаролик ташаббусларини қўллаб-қувватлаш маркази”нинг Фарғона вилояти бўйича лойиҳалар раҳбари Асилжон Мўминов.