Тошкентдаги “Қўйлиқ-9” метро бекатида имконияти чекланган кишилар учун шароитлар яхшиланиши зарур

8 июнь куни Ўзбекистон ногиронлар уюшмаси томонидан “Қўйлиқ-9” янги метро бекатида имконияти чекланган шахслар учун қулайликлар бўйича мониторинг ўтказилди. Уюшма вакилларига Anhor.uz журналисти Мила Аксёнова ҳамроҳлик қилди.

Қулай муҳитнинг асосий тамойили – ҳаракатланишда мустақиллик, яъни ногирон киши у ёки бу жамоат жойидан ҳеч кимнинг ёрдамисиз фойдаланиши лозим.

Суратда кўриб турганингиздек, “Қўйлиқ-9” станциясида тактил йўлаклар бор, лекин улар боши берк кўчага олиб боради.

Лифтга келсак, сиз асосий кириш жойидан қарама-қарши томонга ўтишингиз керак. Ушбу лифт нафақат ногиронлар, балки ҳомиладор аёллар ва қариялар учун ҳам ўрнатилган, лекин у фақат ногиронлар илтимосига биноан ёқилади.

Ўз-ўзидан ногиронлар аравачасида вагонга кириб бўлмайди. Бошқа одамнинг ёрдамисиз, аравача ғилдираги платформа ва метро вагонлари орасидаги бўшлиққа тушиб кетиши мумкин.

Вагонда ногиронлар аравачасини ўрнатишингиз мумкин бўлган махсус жой мавжуд, аммо яна бошқа кишининг ёрдамисиз ўрнатмаларни маҳкамлай олмайсиз.

Ногиронлар уюшмаси станция раҳбариятига фойдаланиш имконияти стандартлари бўйича тавсиялар берди ва тез орада станциядан фойдаланиш имкониятини қайта синовдан ўтказади.

“Бугунги кунда Тошкент шаҳри инфратузилмасини яхшилаш бўйича миллий чора-тадбирлар режаси ишлаб чиқилмоқда. Айни пайтда Тошкентда имконияти чекланган кишилар учун атиги 20 фоизга қулайлик яратилган бўлса, 2030 йилда бу кўрсаткични 45-50 фоизгача ошириш режалаштирилган”, — дейди Уюшма аъзоси Фарҳод Абдураҳмонов.

Унинг сўзларига кўра, мониторинг натижаларидан келиб чиқадиган бўлсак, давлат томонидан қулай муҳит яратиш бўйича амалга оширилаётган ишлар устидан назорат зарур, қулай муҳит бўйича махсус дастур яратиш учун бутун бир тизим керак.

Уюшма Янги Тошкент халқаро стандартлар асосида режалаштирилишига умид қилмоқда, чунки жаҳон тажрибаси кўрсатганидек, дизайн қулайлик асосида бўлиши керак. Германияда бўлажак бинонинг лойиҳаси қулай муҳит яратиш чораларисиз кўриб чиқилмайди. Давлат бундай лойиҳаларга устувор аҳамият бериши керак, дея қайд этади ташкилот.

Суратлар ва матн муаллифи: Мила Аксёнова