Ўзбекистоннинг давлат ташкилотлари қиммат шоколад конфетларига миллионлаб маблағ сарфламоқда

Турли давлат ташкилотлари бир қутисининг нархи 500 минг сўмдан бошланиб, 3,7 миллион сўмга етадиган Qand Choco брендининг қиммат конфетларни харид қилмоқда. Xусусан, ўтган йил июнь ойида Космик мониторинг ва геоахборот технологиялари маркази томонидан умумий қиймати 24,7 миллион сўмлик (ҳар бир қути 1,6 миллион сўмдан ошади) 15 қути шоколад харид қилинган.

“Начинкали 12 та шоколадли конфет солинган, буюртмачининг логотипи ва айдентикаси босилган ҳамда BrandBook  асосида идивидуал дизайн ишланмасига эга брендлаштирилган қути. Унда юқори сифатли сара қуруқ мевалардан фойдаланилган ва конфетлар Brand Book асосида индивидуал брендинг, дизайн ва буюртмачининг логотипи билан безатилган қўлда ишланган қутига қадоқланган. FSSC, Halal, ISO 9001, ISO 22000 халқаро сертификатларига эга L114, M – 114, N823 маркали шоколаддан фойдаланилади”, — дейилади Ўзбекистон давлат харидлари сайтида.

2023 йил май ойида Мактабгача таълимни ривожлантириш жамғармаси томонидан 1,3 миллион сўмга беш қути шоколад харид қилинган. Шу билан бирга, веб-сайтда ТXЯК (Товарлар ва хизматларнинг ягона классификатори) коди “тадбирларни ташкил этиш ва ўтказиш бўйича хизматлар” сифатида белгиланган.

Ўша йилнинг 12 июнида Маданият ва санъатни ривожлантириш жамғармаси томонидан қиймати 154 миллион сўмдан ортиқ бўлган 160 қути шоколад харид қилинган бўлиб, ҳар бир қути бюджетга 965 минг сўмдан сал кўпроққа тушган. Бир кун ўтиб, жамғарма томонидан 61,5 миллион сўмлик 116 қути начинкали шоколад харид қилинган. Ҳар бир қути 531 минг сўмдан тушган. Жамғарма томонидан ўтган йил декабрь ойида ҳар бири 3,7 миллион сўмдан 5 тўплам шоколад харид қилинган. Хариднинг умумий қиймати 18 миллион сўмдан ортиқни ташкил этган.

Харидларда улар президентнинг “Давлат харидлари тўғрисида”ги Ўзбекистон Республикаси Қонунини амалга ошириш чора-тадбирлари тўғрисида”ги 3953-сон қарори асосидаги тадбирлар учун мўлжалланган товарлар эканлиги кўрсатилган. 28-бандда халқаро ва давлатлараро миқёсда тадбирларни ташкил этиш ва ўтказиш билан боғлиқ харидлар давлат буюртмачилари томонидан тўғридан-тўғри шартномалар бўйича амалга оширилиши белгилаб қўйилган.

Ижрочи ҳақида нималар маълум

Saidbob Сhust Масъулияти чекланган жамияти какао, шоколад ва шакарли қандолат маҳсулотлари ишлаб чиқариш билан шуғулланади, устав капитали 973 миллион сўмдан ортиқ. Таъсисчилар – Жщраев Соҳибжамол Бахтиёрович (76,3%) ва Казарян Андраник Валерьевич (23,7%).

Anhor.uz таҳририяти Бош прокуратурага бундай қиммат ширинликларни харид қилишнинг асосли экани ёки йўқлиги ҳақида сўров юборди.