Жонсон Украинага 1991 йилги чегараларни қайтариш талабидан воз кечишни таклиф қилди

Буюк Британия собиқ бош вазири Борис Жонсон Daily Mail учун ёзган мақоласида АҚШда ҳокимият тепасига республикачи Дональд Трамп келадиган бўлса, Украинадаги низо қандай тугаши мумкинлиги борасида ўз фикрлари билан бўлишди.

Унинг фикрича, айнан Трамп урушни Киев ва Ғарб учун манфаатли шартларда якунлай олади. Бундай шартлардан бири сифатида у Украинанинг 2022 йил 23 февралдаги чегараларга чиқишини айтиб ўтди, бу эса 1991 йилги чегараларни қайтариш талабидан воз кечишни англатади.

“Бўлажак зиддиятлар ва ноаниқликлардан қочиш учун Украинанинг қолган қисмини Евроиттифоқ ва НАТО доирасида ўз тақдирини ўзи танлашга қодир ва тез орада уларга қўшилишга мутлақо тайёр эркин мамлакат деб тан олиш зарур бўлади”, — дейилади мақолада.

Жонсон бунинг учун Украинага ҳарбий ёрдамни оширишга ва Россия ҳудуди ичкарисига зарбаларга қўйилган чекловларни олиб ташлашга чақирди, бу Россияни чекинишга мажбур қилиши керак.

Шундай сценарийни амалга оширгандан кейин, собиқ бош вазир Россия билан битим тузиб, Украинада рус тилида сўзлашувчилар учун алоҳида ҳимоя чораларини жорий қилиш, шунингдек, Вашингтон ва Москва ўртасидаги алоқаларни тиклашни таклиф қилди, буларни эса фақат Трамп қила олишини таъкидлади.