3 ҳафта ичида Гаити пойтахтини 53 000 киши тарк этди

Салкам уч ҳафта ичида 53 000 дан ортиқ одам Гаити пойтахтини тарк этди, уларнинг аксарияти тўдаларнинг шафқатсиз зўравонлигидан қутулиш учун шаҳардан қочган. Ушбу маълумотлар БМТнинг сўнгги ҳисоботида келтирилади.

Одамларнинг 60% дан ортиғи Гаитининг жанубий қишлоқларига йўл олган. Бу БМТ расмийларини хавотирга солмоқда, улар зарур инфратузилма етишмаётганини ва мезбон жамоаларда Порт-о-Пренсдан қочаётган одамларнинг бундай катта оқимига дош бериш учун етарли ресурслар йўқлигини таъкидламоқда.

БМТ Халқаро Миграция Ташкилотининг маълумотларига кўра, Гаити жанубида олдинроқ Порт-о-Пренсдан қочган 116 мингдан ортиқ одам бор.

Пойтахтдан 3 миллионга яқин аҳолининг кўчиши февраль ойи охирида зўравон тўдалар ҳукумат идораларига қатор ҳужумлар уюштирганидан кейин кўп ўтмай бошланган. Қуролланган тўдалар полиция бўлимларини ёқиб юборган ва ёпиқ қолаётган асосий халқаро аэропортга қарата ўт очган. Улар Гаитининг иккита энг йирик қамоқхонасига бостириб кириб, 4000 дан ортиқ маҳбусни озод қилган.

Гаитиликлар ўзларининг кундалик ҳаётларини давом эттиришга умид қилишмоқда, аммо отишмалар давом этяпти, кўчада ётган жасадлар ёки тўсатдан отишмаларнинг бошланиши кундалик ҳаётнинг бир қисмига айланган.