Олмаота Марказий Осиёнинг энг қиммат шаҳри сифатида тан олинди

Numbeo ресурсининг  2024 йил январь ойидаги маълумотларига кўра, Олмаота, Астана, Тошкент ва Бишкекни ортда қолдириб, Марказий Осиёда яшаш учун энг қиммат шаҳар бўлди (минтақанинг бошқа шаҳарлари маълумот йўқлиги сабабли рейтингга киритилмаган). Жанубий мегаполис товарлар ва хизматлар нархи, ижара нархлари, озиқ-овқат ва умумий овқатланиш бўйича етакчилик қилмоқда.

Сервис фойдаланувчиларининг ахборотига асосланган Numbeo ҳисоб-китобларига кўра, Олмаотада тўрт кишилик оила, ижара ҳақини ҳисобга олмаганда, ойига тахминан 969,5 минг тенге сарфлайди. Бир киши Олмаотада ўртача 269 минг тенге (уй-жой ижараси нархини ҳисобга олмаган ҳолда) яшаши мумкин. Январь ҳолатига кўра, жанубий мегаполисда Марказий Осиёдаги энг қиммат ресторанлар жойлашган. Аммо Олмаота аҳолиси пулни кўпроқ ресторанларга эмас, балки кўчмас мулкни ижарага олишга сарфлашади – бунга шаҳар аҳолиси ўртача оилавий бюджетининг учдан бир қисми сарфланади.