Amazon Россия махсус кучларига юзларни таниб олиш тизимидан фойдаланиш имкониятини тақдим этган бўлиши мумкин – компаниянинг собиқ ходими

Amazon компаниясининг собиқ ходими Чарльз Форрест компания Россияга қарши санкцияларни бузганини айтди, деб ёзади Financial Times нашри.

Унинг таъкидлашича 2022 йилда Украинага бостириб кирилганидан кейин , компания Россия хавфсизлик кучларига юзни таниб олиш тизимидан фойдаланиш имкониятини таъминлашда давом этган. Форрестнинг маълумотларига кўра, Amazon Rekognition  тизимидан фойдаланиш бўйича шартнома 2020 йилда Россиянинг VisionLabs билан боғланган Голландиядан сохта компания томонидан имзоланган.

Бу компания юзни таниб олиш тизимини ишлаб чиқиш билан шуғулланади. Унинг мижозлари орасида Россиянинг йирик банклари ва Москва метроси бор. 2021 йилда МТС VisionLabs компаниясининг 100 фоиз акцияларини 7 миллиард рублга сотиб олганди.

Лондон судида бўлиб ўтган дастлабки суд мажлисида Amazon вакили компания VisionLabs компаниясига юзни таниб олиш тизимига киришни таъминламаганлигини, бундан тақдим этилган ҳисоблар бўйича маълумотлар далолат беришини айтган.

“Би-би-си рус хизмати” аввалроқ VisionLabs технологияси Москва видеокузатув тизимида қўлланилишини аниқлаган эди. Хавфсизлик кучлари ундан мухолифат фаолларини репрессия қилиш учун фойдаланади.

2023 йил февраль ойида VisionLabs АҚШнинг санкциялар рўйхатига киритилган. Кейинчалик у Россиядаги шўъба корхонасига эга бўлган Голландиядаги бош компаниядан воз кечган.