АҚШда Boeing 737 самолёти парвоз чоғида ташқи қопламасининг бир қисмидан ажралди

United Airlines авиакомпаниясининг Boeing 737-800 самолёти Американинг Орегон штати Медфорд шаҳрига ташқи панелсиз қўнди, деб хабар беради Fox News компания вакилига таяниб.

Рейс Сан-Францискодан учиб чиқиб, якуний манзилга — Роуг Вэлли халқаро аэропортига Тошкент вақти билан 16 март куни 01:45 да эсон-омон қўнган.

Инспекция парвоздан кейинги текширув чоғидагина самолётда ташқи панель йўқлигини аниқлаган. Шундан кейин аэропорт ўз ишини тўхтатган, самолёт қопламасининг йўқолган қисмини топиш мақсадида учиш-қўниш йўлаги ва аэродром текшириб чиқилган, аммо ҳеч нарса топилмаган.

Самолёт бортида 139 йўловчи ва олти нафар экипаж аъзоси бўлган, улар жабр кўрмаган.

Ҳолат юзасидан суриштирув олиб борилмоқда.