Австралияда “Путинга қарши чошгоҳ” акцияси ўтказилди

9 март, шанба куни Австралиянинг Мельбурн шаҳрида Россия президентлигига сайловлар доирасида муддатидан олдин овоз бериш жараёнида мухолифатчи Алексей Навальний тарафдорлари томонидан “Путинга қарши чошгоҳ” норозилик акцияси бўлиб ўтди. Бу ҳақда «Сирена» телеграм канали хабар беради. Мельбурндаги “Россия уйи”да намойишчилар Путинга қарши плакатлар ва Навальнийнинг фотосуратларини жойлаштирди.

Тадбирга ташриф буюрганларнинг маълумотларига кўра, овоз бериш жойи бино ичида ҳам, ташқарисида ҳам иссиқ шароитда навбатда турганлар билан гавжум бўлган. Баъзи иштирокчилар ҳафта охири режаларини ортда қолдириб, акцияда иштирок этиш учун шаҳарга махсус қайтишган.

Австралияда Россия президенти сайловлари турли вақтларда бўлиб ўтади: муддатидан олдин овоз бериш 2 март куни Аделаида, 9 март куни Мельбурн, Брисбен ва Пертда бўлиб ўтди. Овоз бериш 17 март куни Сидней ва Канберрада ўтказилиши режалаштирилган.

“Путинга қарши чошгоҳ” ташаббуси январь ойи охирида Россия мухолифатининг айрим аъзолари томонидан таклиф қилинган ва Владимир Путин сиёсатини қўллаб-қувватламайдиганларни чошгоҳ пайтида сайловга боришга чақирган эди. Акция ташкилотчилари бирдамлик ва мухолифат кайфиятидаги фуқаролар кўпчиликни ташкил этишини кўрсатиш муҳимлигини таъкидлашади. Алексей Навальний 1 февраль куни қамоқдан туриб акцияни қўллаб-қувватлади ва ундан кейин бошқа таниқли россиялик мухолифатчилар, жумладан Михаил Ходорковский, Михаил Лобанов, Максим Резник ва Дмитрий Гудковлар ҳам уни қўллаб-қувватлади.