АҚШда Украинага ҳарбий кўмак борасида “Б режаси” йўқ — Bloomberg

АҚШда Украинага ҳарбий ёрдам бўйича конгрессдаги келишмовчиликлар туфайли, ажратиш имконияти бўлмаётган 60 миллиард доллардан ташқари, бошқа “Б режаси” йўқ. Бу ҳақда Bloomberg америкалик мансабдорларга таяниб ёзмоқда.

Нашр суҳбатдоши сўзларига кўра, АҚШ президенти Жо Байден маъмурияти Украинага кўмак кечикаётгани туфайли Конгрессдаги республикачилардан ҳам, Оқ уй фикрича, Россиянинг музлатилган активларидан тушган фойдани Киевга ёрдам учун ишлатиши керак бўлган Европадаги иттифоқдошлардан ҳам ҳафсаласи пир бўлган.

Шунингдек, америкалик мансабдорлардан бири қайд этишича, Европа мамлакатлари Украинанинг илтимосига зудлик билан жавоб кўрсатиб, унга ўз захираларидан янада кўпроқ Patriot ҳаво ҳужумига қарши мудофаа тизимларини тақдим этиши керак.

АҚШ Конгресси ўтган куздан буён Украинага 61 миллиард доллар миқдоридаги ҳарбий кўмак ажратилишини маъқуллай олмаяпти, бунга республикачилар ва демократлар ўртасидаги келишмовчилик сабаб бўлмоқда.

20 март куни АҚШ президентининг миллий хавфсизлик бўйича маслаҳатчиси Жейк Салливан Киевга эълон қилинмаган ташриф билан келган ва Украинага ҳарбий ёрдам ҳақидаги қонун лойиҳаси иккала партия томонидан тасдиқланишини ваъда қилган эди. Аммо у бу қачон юз беришини прогноз қилиб ўтирмаганди. Шунингдек, у Б режаси ҳақида гапиришга ҳозирча ҳожат йўқлигини айтганди.