“Берил” довули Юнион оролидаги деярли барча уйларни вайрон қилди, энди у Ямайка томон ҳаракатланмоқда

Кариб денгизида шаклланган “Берил” довули душанба куни Гренада ва Сент-Винсент орол давлатлари ҳамда Гренадин оролларига ҳалокатли зарбалар берди ва Ямайка томон ҳаракатланишда давом этмоқда.

“Довул Сент-Винсент ва Гренадин ороллари таркибига кирувчи Юнион оролидаги деярли барча биноларни вайрон қилди. Натижада орол аҳолисининг катта қисми бошпанасиз қолди”, – дейди Би-Би-Сига маҳаллий аҳолидан бири Катрина Кой.

Юнион оролида 3 мингга яқин одам яшайди, унинг узунлиги тахминан беш километр ва кенглиги бир ярим километрни ташкил қилади.

“Бизда деярли бутун бинолар қолмади. Уйлар вайрон бўлган, йўллар тўсилган, кўчаларда электр устунлари ётибди”, – дейди у.

АҚШ Миллий довулларни кузатиш маркази чоршанба куни Ямайка “ҳаёт учун хавфли шамол ва бўронлар”га дучор бўлишидан огоҳлантирмоқда. Шамол тезлиги соатига 250 км га етиши кутилмоқда.