БМТ: 100 мингдан ортиқ киши Рафахни тарк этди

Исроил армияси аҳолини шаҳардан эвакуация қила бошлаганидан кейин охирги беш кун ичида Ғазо сектори жанубидаги Рафах шаҳрини 110 мингга яқин одам тарк этди. Бу ҳақда жума куни БМТнинг гуманитар масалаларни мувофиқлаштириш бошқармаси расмийси Георгиос Петропулос маълум қилди. Исроил аввалроқ ҳужум қилганини эълон қилган бу шаҳарда жами 1,3 миллионга яқин қочқин бор, бу Ғазо сектори аҳолисининг ярмидан кўпини ташкил қилади.

Агар қўшимча ёрдам келмаса, Петропулоснинг айтишича, Жаҳон озиқ-овқат дастури Ғазо секторининг жанубида тарқатиши учун шанба кунигача озиқ-овқат захиралари тугайди. БМТ расмийлари ёқилғи танқислиги Ғазо сектори бўйлаб соғлиқни сақлаш муассасалари, сув таъминоти ва канализация тизимлари ишламай қолаётгани ҳақида огоҳлантирмоқда, дея хабар беради AP.

«Ҳозирги вазият мисли кўрилмаган фавқулодда ҳолат даражасига етди”, – дея Петропулоснинг сўзларини келтиради dpa агентлиги. “Мен сўнгги 30 йил давомида биринчи навбатда кенг кўламли гуманитар фавқулодда вазиятларда ишладим ва ҳеч қачон бундай ҳалокатли, мураккаб ва беқарор вазият билан шуғулланмаганман», – дейди ЮНИСEФ Фавқулодда ёрдам координатори Хэмиш Янг.

Яқин Шарқдаги можаронинг авж олиши Европа Иттифоқи ва АҚШ томонидан террорчи ташкилот деб тан олинган радикал исломий Хамас ҳаракати 7 октябрь куни Исроилга қарши кенг кўламли ҳужум уюштирганидан сўнг бошланди. Террорчилар Исроилга йирик ракета ҳужумини уюштирди, унинг ҳудудига бостириб кирди ва тинч аҳолига нисбатан замонавий Исроил давлати тарихидаги энг оммавий қирғинни амалга оширди. 1200 дан ортиқ одам унинг қурбонига айланди.

Сўнгги маълумотларга кўра, жангарилар 250 га яқин одамни Ғазо секторига гаровга олиб кетган. Исроил бунга жавобан Хамасга қарши уруш эълон қилди. Мамлакат армияси Хамас бошқаруви остидаги аҳоли зич жойлашган ушбу Фаластин ҳудудига катта зарбалар бериб, қуруқликда ҳарбий амалиётларни ҳам олиб бормоқда. Хамас назоратидаги Соғлиқни сақлаш вазирлигининг маълумотларига кўра, Ғазо секторида қарийб 35 минг киши ҳалок бўлган, 78 ярим мингдан ортиқ киши жароҳатланган. Бу маълумотларни мустақил манбалар орқали тасдиқлашнинг иложи йўқ.