Британия разведкаси Украинанинг Қримга ҳужумлари муваффақиятли эканини қайд этди

Буюк Британия Мудофаа вазирлигининг фикрича, Украинанинг сўнгги муваффақиятли ҳужумлари Россиянинг Қрим атрофидаги ҳаво ҳудудини ҳимоя қилиш қобилиятининг умумий ёмонлашувига олиб келди. Бу ҳақда Британия Мудофаа вазирлигининг Россия-Украина уруши ҳақидаги шарҳида сўз боради.

14 май куни Украина ҳарбийлари Россия ҳарбий объектларига зарбалар берди, натижада Белбек аэродромида С-400 зенит-ракета батареяси комплекси, жумладан радар ва учириш мосламалари йўқ қилинди. Бундан ташқари, камида иккита МиГ-31БМ самолёти ерда йўқ қилингани хабар қилинган.

Россиянинг Қримдаги ҳаво ҳужумидан мудофаа тизими сўнгги бир ой ичида тўртинчи бор йўқотишларга учради. Аввалроқ Украина Қуролли кучлари Ай-Петри радиолокация станциясида, шунингдек, Жанкой аэродромида муваффақиятли амалиётлар ўтказган эди.

Ушбу зарбаларнинг умумий таъсири Россиянинг Қрим атрофидаги ҳаво ҳудудини ҳимоя қилиш қобилиятининг умумий ёмонлашишига олиб келди, шу билан бирга Украинанинг Россия ҳаво ҳужумидан мудофаа операцияларига таъсир қилиш қобилиятини намойиш этди, дейилади шарҳда.

Бу Россия ўз ҳаво кучларини тарқоқ жойлаштиришга мажбур бўлишига ёки кўпроқ самолётларни йўқотиш хавфига, шунингдек, бошқа жойлардан ҳаво мудофаа воситаларини қайта жойлаштиришга олиб келиши мумкин.

А-50 самолётларининг қамровини қисқартириш ва уларни Қрим аэродромларидан тарқоқ жойлаштириш парвоз соатларининг кўпайишига ва қамров бўшлиқларини тўлдириш учун қирувчи миссиялар частотасининг ошишига олиб келади, бу эса уларнинг флотларига техник хизмат кўрсатиш билан боғлиқ муаммоларнинг кучайишини туғдиради.