ЕИ Россия тарғиботига қарши янги санкцияларни тайёрламоқда

Франция Европа Иттифоқини Россия тарғиботи ва Кремлнинг бутун дунё бўйлаб сайловларга аралашиш ҳаракатларига қарши янги санкциялар жорий этишга чақирди. Ушбу чақириқ Эстония, Латвия, Литва, Нидерландия ва Польшада қўллаб-қувватланди.

Унга кўра турли мамлакатларда Россия томонидан молиялаштириладиган беқарорлаштирувчи ҳаракатларда иштирок этувчи жисмоний ва юридик шахсларга нисбатан чеклов чораларини жорий этиш таклиф қилинмоқда. Bloomberg томонидан кўрилган ҳужжатда Россия режими Европадаги демократия ва барқарорликка путур етказиш учун гибрид воситалардан фаол фойдаланаётгани қайд этилган.

Июнь ойида бўлиб ўтадиган Европа парламентига сайловлар билан Европа Иттифоқи Россиянинг дезинформациясига қарши курашишга алоҳида эътибор қаратмоқда. Бу ҳодиса, айниқса, ижтимоий медиа платформаларида тобора кучайиб бораётган муаммога айланяпти.

Ғарбда Россия дезинформациясининг самарадорлигига ўтган йили Европада фермерларнинг норозилик намойишлари мисол бўла олади. Россия тарғиботи бу хатти-ҳаракатларни Украинага ёрдамга қарши норозилик ифодаси сифатида тақдим этди, аслида бу сохта бўлиб чиқди. The Observers  фактларни текшириш агентлиги фермерларнинг норозиликлари Украина контекстидан олдин бошланганини ва бунга ҳеч қандай алоқаси йўқлигини аниқлади.

Дезинформация ва сохта янгиликлардан кўп фойдаланиш Кремлнинг Ғарбда келишмовчилик ва хавотирни кучайтириш стратегиясининг бир қисмидир. Бу Ғарб давлатларининг Россия таҳдидларига қарши туриш қобилиятини заифлаштиришга ва Москвага хайрихоҳ экстремистик партиялар позициясини мустаҳкамлашга ёрдам беради.