Исроил Эрондаги объектга ракета зарбаси берди

Эроннинг Исфахон вилоятидаги Кахжаваристон шаҳрида портлаш юз берди, дея хабар қилди Эроннинг Fars агентлиги. ABC News маълумотларига кўра, Исроил Эрондаги объектга ракета зарбаси берган.

Ҳужум нишони нима бўлгани ҳозирча номаълум, жабрланганлар ҳақида ҳам маълумот йўқ. Reuters Исфахон вилоятида ҳаво ҳужумига қарши мудофаа тизими ишга тушганини тасдиқлади. Кахжаваристон яқинида аэропорт ва Эрон Ҳарбий-ҳаво кучларининг “Шакарий” 8-базаси жойлашган.

Агентлик маълумотларига кўра, Исфахон, Шероз ва Теҳрон шаҳарлари осмонида парвозлар тўхтатилган. AFP қайд этишича, Эрон бир нечта шаҳарларда ҳаво ҳужумига қарши мудофаа тизимини фаоллаштирган.

14 апрелга ўтар кечаси Эрон юзлаб дронлар ва ракеталар ёрдамида Исроил ҳудудига ҳужум қилди, улар АҚШ ва Буюк Британия кўмагида уриб туширилди. Зарба 1 апрель куни Исроил томонидан Эроннинг Дамашқдаги элчихонасига қилинган ҳужумга жавобан берилди. Шундан кейин Исроил армияси Бош штаби бошлиғи Герци Халеви Исроил Эронга жавоб зарбаси беришини айтди.

Исроил мудофаа армияси (ЦАХАЛ) Эрон томонидан 14 апрелга ўтар кечаси қилинган ҳужумга қандай жавоб қайтариши ҳақида қарор қабул қилиб бўлгани, аммо бу жавоб бериладиган вақт ҳозирча аниқ эмаслиги маълум бўлганди. Кейинроқ эса Эрон Исроилнинг барча ядро объектлари қаерда жойлашгани ҳақида маълумотга эга экани ва уларга зарба беришга тайёрлигини билдирди.