ФХХ: Россияда терактлар содир этиш учун Украина ва НАТО махсус хизматлари меҳнат муҳожирларини ёлламоқда

Россия Федерал хавфсизлик хизмати (ФХХ)  директорининг айтишича, Украина ва НАТО махсус хизматлари Россияда терактлар уюштириш учун меҳнат муҳожирларини жалб қилмоқда. Александр Бортниковнинг сўзларига кўра, Украина гўёки “Россия ҳудудида террорчилик хуружлари ва қўпорувчилик ҳаракатларини кучайтириб, Россия армиясига ресурс ёрдамини сусайтирмоқчи ва аҳоли орасида ваҳима қўзғатмоқчи”.

Унинг таъкидлашича, Украина ва НАТО махсус хизматлари “ўта шов-шувли жиноятлар содир этганларни, шу жумладан меҳнат муҳожирлари орасидан” қидирмоқда ва уларни ёлламоқда.

Мисол тариқасида, Бортников ФХХ томонидан “аниқланган” Москва яқинидаги “Крокус-сити холл” залидаги терактда Украина ҳарбий разведкасининг иштирокини келтиради. У Украина разведкаси, ФХХ фикрича, терактга қандай алоқадорлиги ҳақида батафсил маълумот бермаган.

Москва яқинидаги “Крокус Сити Холл”да 144 кишининг ҳаётига зомин бўлган ва 500 дан ортиқ киши жароҳатланган теракт учун жавобгарликни “Исломий давлат” террорчилик гуруҳи “Вилоят Хуросон” гуруҳи ўз зиммасига олган. Россия расмийлари ҳеч қандай далил келтирмасдан, Украинани ҳужумга алоқадорликда айблади. Киев бу айбловларни рад этди.